Shqipëria renditet mes vendeve me stokun më të lartë të banesave për frymë në Europë, megjithëse çmimet dhe qiratë vijojnë të jenë të paarritshme për shumë familje. Të dhënat e raportit “Property Index” të Deloitte tregojnë se vendi ka 482 banesa për 1.000 banorë, dukshëm mbi mesataren europiane prej 450 banesash.
Ky nivel e vendos Shqipërinë përpara ekonomive të zhvilluara si Mbretëria e Bashkuar, Izraeli dhe Greqia, duke e bërë paradoksale situatën ku oferta e bollshme e banesave nuk është përkthyer në lehtësim të tregut për blerësit dhe qiramarrësit.
Sipas raportit, Bullgaria kryeson listën me 672 banesa për 1.000 banorë, ndërsa pas saj vijnë Franca (556) dhe Belgjika (490). Në të kundërt, Greqia mbetet me stokun më të ulët në Europë me vetëm 288 banesa për 1.000 banorë, e ndjekur nga Izraeli (295) dhe Mbretëria e Bashkuar (375).
Rritja e konsiderueshme e stokut në Shqipëri lidhet me disa faktorë: tradita e pronësisë së shumëfishtë të banesave brenda familjeve, emigracioni i lartë që ka ulur numrin e banorëve rezidentë dhe boom-i i ndërtimit pas viteve 2000, veçanërisht në zonat urbane dhe turistike.
Megjithatë, pavarësisht volumit të madh të ndërtesave, çmimet e shitjes dhe qiratë vijojnë të rriten, duke reflektuar kërkesë të lartë nga investitorët, informalitet në treg, orientim të projekteve drejt tregut të luksit dhe mungesë të strehimit të përballueshëm për shtresat mesatare.
Si ka mundësi që një vend me një nga stoqet më të larta të banesave për frymë në Europë vazhdon të ketë një treg kaq të shtrenjtë për qytetarët e tij? /skyweb.al
