Policia e Shtetit ka shpallur për shitje disa prej qenve të saj të shërbimit, të cilët janë aktualisht në administrim të Institutit të Përgatitjes së Qenëve të Policisë në Tiranë.
Në listën e publikuar për ankand figurojnë gjithsej tetë qen me moshë të ndryshme, të cilët do të shiten me çmim fillestar 10 mijë lekë secili, ose rreth 100 euro. Ndër ta është edhe qeni “Kofi”, i lindur më 3 tetor 2013, i cili së bashku me qentë e tjerë do të nxirret në ankand më 15 korrik 2025, në ambientet e Drejtorisë së Shërbimit të Përgatitjes së Policisë.
Çdo person fizik apo juridik i interesuar për të marrë pjesë në ankand duhet të dorëzojë pranë Ministrisë së Ekonomisë, Kulturës dhe Inovacionit dokumentacionin e kërkuar, që përfshin: kërkesën me shkrim për blerje, garancinë bankare apo mandat pagesën për 20% të vlerës fillestare, si dhe dokument identifikimi.
Shitja e qenve të shërbimit vjen zakonisht si rezultat i daljes së tyre në pension ose të paaftësisë për të vijuar më tej shërbimin aktiv pranë strukturave të Policisë së Shtetit. /skyweb.al
