Inteligjenca artificiale është përdorur për të zhvilluar një lloj vaksine që mund të ofrojë mbrojtje kundër një game të gjerë virusesh dhe të ndihmojë në parandalimin e pandemive të ardhshme, thonë studiuesit, shkruan BBC.
Ekipi i studiuesve në Universitetin e Kembrixhit deklaron se kjo është hera e parë që komponenti kryesor i një vaksine është projektuar tërësisht nga inteligjenca artificiale dhe më pas është testuar te njerëzit.
Vaksina është krijuar për të vepruar kundër të gjithë koronavirusëve, duke përfshirë të gjitha variantet e Covid-19, si dhe viruset që aktualisht qarkullojnë te kafshët, por që kanë potencialin të shkaktojnë pandeminë e ardhshme.
Megjithëse puna është ende në fazat e hershme, ekipi po zhvillon tashmë vaksina të ngjashme kundër gripit dhe Ebolës.
Zakonisht, vaksinat projektohen duke u bazuar në një variant ekzistues të virusit.
Studiuesit e Kembrixhit morën kodet gjenetike të njohura, udhëzimet bazë të jetës nga një sërë koronavirusësh të identifikuar nga programet e monitorimit që kërkojnë kërcënime të mundshme virale.
Këto kode gjenetike u analizuan nga një sistem inteligjence artificiale, i cili më pas projektoi një “super-antigjen” që mund të trajnojë sistemin imunitar në mënyrë të tillë që të ofrojë mbrojtje ndaj gjithë familjes së këtyre viruseve, edhe nëse ato pësojnë mutacione ose kalojnë nga kafshët te njerëzit.
Antigjenet janë komponentët më të rëndësishëm të vaksinave, pasi janë pikërisht ato që sistemi imunitar mëson të njohë dhe të sulmojë.
Profesori Jonathan Heeney tha se kjo është hera e parë që një antigjen i projektuar nga inteligjenca artificiale testohet te njerëzit. Sipas tij, teknologjia “po na befason të gjithëve” dhe është “e jashtëzakonshme ajo që mund të bëjmë me të për të mirën e njerëzimit”.
Vaksinat e mësojnë organizmin tonë të njohë një infeksion, duke rritur mundësinë për ta luftuar atë me sukses.
Megjithatë, disa viruse janë shumë të aftë të ndryshojnë pamjen e tyre përmes mutacioneve, çka bën që vaksinat të dalin shpejt jashtë përdorimit. Kjo është arsyeja pse vaksinat kundër Covid-19 dhe gripit sezonal duhet të përditësohen rregullisht.
“Ne jemi gjithmonë një hap pas,” tha Prof. Heeney, duke shtuar se “ajo që po përpiqemi të bëjmë është të dalim përpara zhvillimeve”, aq sa të mund të mbrojmë njerëzit edhe nga shpërthime të reja apo pandemia të ardhshme. /skyweb.al
