Ministri i Brendshëm, Besfort Lamallari, ka paralajmëruar masa më të forta ndaj drejtuesve të mjeteve që parkojnë gabim në rrugë, lagje dhe hapësira publike.
Përmes një reagimi në rrjetet sociale, Lamallari tha se parkimet e gabuara janë ndër ankesat më të shpeshta që qytetarët i kanë dërguar në adresën e tij elektronike apo në telefon.
Sipas ministrit, ky fenomen është kthyer në shqetësim për banorët, këmbësorët dhe përdoruesit e tjerë të rrugës, sidomos kur mjetet bllokojnë trotuaret, hyrjet e pallateve apo hapësirat e përbashkëta.
“Një nga ankesat më të shpeshta që kam marrë në adresën time elektronike apo në telefon janë pikërisht parkimet e gabuara nëpër lagje e rrugë, të cilat bëhen shqetësim për banorët e komunitetit dhe përdoruesit e tjerë të mjeteve,” u shpreh Lamallari.
Ai e cilësoi parkimin e pakujdesshëm si sjellje aspak civile dhe shpërfillje ndaj ligjit dhe rregullave të bashkëjetesës në komunitet.
Ministri theksoi se Policia e Shtetit ka nisur një fushatë të intensifikuar për ndëshkimin e këtyre shkeljeve dhe se nuk do të ketë tolerim për askënd.
“Policia e Shtetit nuk do të tolerojë asnjë shkelje, pavarësisht se kush është shkelësi. Nuk ka rëndësi mbiemri që mban, pozicioni që pretendon apo marka e makinës që drejton. Para ligjit, të gjithë janë të barabartë dhe rregullat vlejnë njësoj për secilin,” deklaroi ministri.
Bashkë me reagimin, Lamallari publikoi edhe një video nga aksionet e Policisë së Shtetit në terren, ku shihen kontrolle, masa administrative dhe gjoba ndaj drejtuesve që kanë parkuar në mënyrë të gabuar.
Sipas ministrit, qëllimi i aksionit është lirimi i hapësirave publike dhe vendosja e rregullit në zonat urbane, ku parkimet e gabuara janë kthyer në problem të përditshëm për qytetarët.
