Reshjet e para të borës që kanë mbuluar veriun e Shqipërisë e kanë kthyer fshatin turistik Razëm në Shkodër në një destinacion gjithnjë e më të kërkuar nga vizitorët.
I vendosur në zemër të Alpeve Shqiptare, në rreth 900 metra lartësi mbi nivelin e detit, ky fshat ofron një peizazh të larmishëm e magjepsës: nga majat e thepisura të maleve, te lëndinat dhe kullotat alpine që shtrihen mbi terrenin akullnajoro-karstik.
Kryeministri Edi Rama ka ndarë sot pamje nga turistët që po shijojnë borën e parë në Razëm.
Rruga panoramike që të çon drejt fshatit ofron pamje të mrekullueshme natyrore mes maleve, duke e bërë udhëtimin vetë një përvojë të këndshme për çdo vizitor.
E vendosur në shpatet e malit të Veleçikut dhe vetëm 40 kilometra larg Shkodrës, Razma shndërrohet në një destinacion mjaft të frekuentuar sidomos gjatë dimrit, kur pyjet e dendur me ah e pishë krijojnë skena spektakolare nën shtresën e borës.
Shumë vizitorë zgjedhin Razmën për fundjava dimri apo për të praktikuar sporte të ndryshme dimërore. /Skyweb.al
