Drejtoria e Përgjithshme e Shërbimeve të Transportit Rrugor njofton se mjetet që rezultojnë me mangësi gjatë kontrollit teknik do të ritestohen vetëm në të njëjtën Qendër të Kontrollit Teknik ku është kryer verifikimi fillestar.
Sipas DPSHTRR, kjo procedurë garanton një verifikim të drejtë pas riparimeve dhe një ndjekje të saktë dhe të dokumentuar të gjithë procesit teknik.
Njëkohësisht shmangen lëvizjet e panevojshme të mjeteve, kostot shtesë për qytetarët dhe krijohet një gjurmim i qartë i historikut të kontrollit teknik të çdo automjeti.
Qytetarët që kanë kryer kontrollin teknik dhe rezultojnë me detyrime për riparim duhet të rikthejnë mjetin në të njëjtën QKT për ritestim. DPSHTRR thekson se kjo masë ndihmon drejtpërdrejt në forcimin e sigurisë rrugore dhe rritjen e besueshmërisë së gjithë procesit të kontrollit teknik në vend. /skyweb.al
