Çmimi i arit ka rënë nën 4 mijë dollarë për ons, për herë të parë që nga nëntori 2025.
Rënia lidhet kryesisht me forcimin e dollarit amerikan dhe pritshmëritë se normat e interesit në SHBA do të qëndrojnë të larta, ose mund të rriten sërish gjatë këtij viti.
Kur dollari forcohet, ari bëhet më i shtrenjtë për blerësit që përdorin monedha të tjera. Kjo ul kërkesën dhe ushtron presion mbi çmimin.
Një tjetër faktor negativ për arin janë normat e larta të interesit. Ari nuk jep interes apo yield, ndaj bëhet më pak tërheqës për investitorët kur obligacionet dhe instrumentet e tjera financiare ofrojnë kthime më të larta.
Sipas analistit Tai Wong, tregu po ndikohet nga pritshmëritë për rritje të normave të interesit nga Rezerva Federale, nga dollari në nivele të larta dhe nga ndryshimi i pritshmërive për inflacionin.
Megjithatë, ai vlerëson se një rënie e fortë e mëtejshme nuk është shumë e mundshme, pasi bankat qendrore vijojnë të blejnë ar.
Ari kishte arritur rekord historik në fund të janarit, në 5,594 dollarë për ons. Që prej atij niveli, çmimi ka humbur mbi 1,500 dollarë.
Edhe analistët e ING kanë ulur parashikimet për arin. Ata presin që çmimi mesatar të jetë 4,300 dollarë për ons në tremujorin e tretë të vitit 2026 dhe 4,600 dollarë në tremujorin e katërt.
