Ambasada e Shteteve të Bashkuara në Shqipëri ka publikuar një njoftim të rëndësishëm për të gjithë qytetarët shqiptarë që planifikojnë të udhëtojnë drejt SHBA-së për të ndjekur ndeshjet e Kupës së Botës 2026, e cila do të mbahet në SHBA, Meksikë dhe Kanada nga 11 qershori deri më 19 korrik të vitit të ardhshëm.
Në njoftim thuhet se SHBA-të janë gati të sigurojnë kushte të sigurta dhe të mbrojtura për vizitorët ndërkombëtarë që dëshirojnë të ndjekin këtë event madhor sportiv, si dhe të përpunojnë pa vonesa aplikimet për vizë turistike. Ambasada u bën thirrje të gjithë personave që kanë nevojë për vizë amerikane që të nisin procesin e aplikimit sa më herët.
Ndërkohë, Shqipëria dhe Kosova kanë arritur historikisht në fazën “play-off” të Kupës së Botës dhe u duhen edhe dy fitore në ndeshjet që zhvillohen në fund të marsit për të siguruar pjesëmarrjen në kompeticionin më prestigjioz të futbollit botëror. /Skyweb.al
