Çmimi i arit arriti një nivel rekord të martën, duke kaluar rekordin e mëparshëm të prillit, mes dobësimit të dollarit dhe pritshmërive për një ulje të normës së interesit në SHBA gjatë këtij muaji. Çmimi referencë i arit u ngjit mbi 3,526 dollarë për ons, duke u rritur me 34 për qind që nga fillimi i vitit.
Analistët theksojnë se presioni i Presidentit Donald Trump ndaj kreut të Rezervës Federale, Jay Powell, si dhe vendimi për shkarkimin e guvernatores Lisa Cook, kanë rritur shqetësimet për pavarësinë e Fed, duke nxitur interesin për arin si strehë të sigurt. “Sfida e hapur ndaj pavarësisë së Fed nga Presidenti Trump dhe deficiti buxhetor i SHBA janë faktorë kyç që po e çojnë arin lart,” u shpreh Marcus Garvey, strateg i mallrave në Macquarie.
David Wilson nga BNP Paribas tha se kombinimi i paqartësive ekonomike dhe presionit politik mbi politikën monetare po krijon “situatën perfekte për rritje të arit”. Edhe Krishan Gopaul nga Këshilli Botëror i Arit u shpreh se edhe strehimet tradicionale si dollari dhe obligacionet amerikane po humbasin sigurinë, duke e kthyer arin në alternativë natyrale për investitorët.
Edhe argjendi shënoi rritje rekord, duke arritur në 40.8 dollarë për ons – niveli më i lartë në 14 vitet e fundit – megjithëse ende mbetet më i lirë në krahasim me arin sipas mesatares historike.
Sipas analistëve të Goldman Sachs, kërkesa në rritje nga fondet e tregtuara në bursë dhe bankat qendrore po mbështet trendin, duke parashikuar se ari mund të arrijë deri në 4,000 dollarë për ons deri në mesin e vitit të ardhshëm. Vitin e kaluar, ari tejkaloi euron si rezerva e dytë më e përdorur nga bankat qendrore pas dollarit, duke përfaqësuar 20 për qind të rezervave globale zyrtare, me blerës kryesorë Indi, Kinë, Turqi dhe Poloni.
Ekspertët theksojnë se kjo prirje e “de-dollarizimit” nga disa banka qendrore po shërben si garanci shtesë për çmimin e arit, ndërsa investitorët vazhdojnë ta shohin si mbrojtje ndaj inflacionit dhe pasigurisë ekonomike. /FT
