Alarmi të zgjon me një tronditje: pushimet verore kanë mbaruar dhe është koha të përballesh me kutinë e postës elektronike plot me email-e të palexuara.
Vetëm një javë më parë, jeta ishte shumë ndryshe. Shijoje netët e gjata, mëngjeset e qeta, duke alternuar kohën me familjen me pak kohë vetëm për veten.
Edhe nëse e pëlqen punën tënde, rikthimi nga pushimet në punë mund të jetë i vështirë, veçanërisht në shtator, kur ditët fillojnë të shkurtohen.
Ja disa mënyra për ta bërë këtë tranzicion pak më të lehtë.
Përfundo detyra të vogla
Mund të jetë joshëse të fillosh menjëherë me detyrën më të vështirë.
Por trajnerja e karrierës, Sarah Robinson, thotë se është më mirë të “rikthehesh gradualisht” duke filluar me detyra të vogla, të menaxhueshme dhe me “fitore të shpejta”.
“Ka të bëjë me përpjekjen për të krijuar ritëm, sepse ndonjëherë mund të ndihemi të mbingarkuar kur kemi një kuti postare gjigante,” thotë ajo.
Këshilltarja Susan Carr është dakord. Ajo thotë se kjo nuk është e mundur në çdo industri, por aty ku është e zbatueshme, “duhet të jesh pak më i butë me pritshmëritë për atë që duhet të bësh ditën e parë pas kthimit në punë”.
Kjo mund të nënkuptojë që ta kalosh ditën duke kontrolluar email-et, në vend që ta mbushësh të gjithë ditën me takime njëra pas tjetrës.
Tara Humphrey, konsulente për drejtimin në kujdesin shëndetësor parësor, këshillon që mesazhin automatik të mungesës (“out of office”) ta mbajë aktiv edhe ditën e parë pas kthimit.
“Ka të bëjë me t’u fshehur, nëse mundesh, vetëm që t’i japësh vetes pak hapësirë për të menduar.”
Ajo gjithashtu thotë se rikthimi në jetën e punës mund të bëhet më i lehtë me një mesazh të qartë të mungesës, ku u kërkohet njerëzve të kontaktojnë përsëri pasi të jesh kthyer në zyrë. Kjo e ul stresin dhe shqetësimin nëse ke humbur ndonjë gjë të rëndësishme gjatë pushimeve.
Ekziston edhe një alternativë. Ajo kujton një koleg i cili thjesht fshinte të gjitha email-et që i kishin ardhur gjatë pushimeve.
“Ai thoshte: ‘Nëse kanë nevojë për mua, do të më kontaktojnë përsëri.’”
Vazhdoni të jeni turistë, por në shtëpi
Carr thotë se ia vlen gjithashtu të kujtosh se çfarë të pëlqeu gjatë pushimeve dhe “nëse ka ndonjë mënyrë për ta integruar atë më shumë në jetën e përditshme”.
Ndoshta nuk është realiste të bësh një sy gjumë çdo ditë, por mund të provosh të gatuash ushqime spanjolle, sugjeron ajo.
Ajo rekomandon gjithashtu të ruajmë kureshtjen që kemi kur ndodhemi në një vend të ri dhe të përpiqemi të sillemi si turistë edhe në zonën ku jetojmë.
“Kur shkojmë diku tjetër… mund të vëzhgojmë arkitekturën, të vizitojmë ndërtesa, ndërsa mendoj se – dhe e pranoj se edhe unë e bëj këtë në Mançester – jo gjithmonë i vlerësojmë gjërat që kemi pranë nesh.”
Psikoterapistja Dr Joy Conlon, e cila drejton shërbimin e mirëqenies Alive 365, është dakord.
“Sillni me vete në shtëpi një pjesë të pushimeve që ju ndihmon të rikuperoni. Kjo mund të jetë një shëtitje në mbrëmje, të hani pa parë ekranin, të lexoni para gjumit në vend që të qëndroni para ekranit, ose thjesht të kaloni më shumë kohë jashtë.”
Reflektoni mbi rolin tuaj
Në vend që të trajtoni vetëm simptomat, mund të jetë e vlefshme të shikoni shkakun e vërtetë të trishtimit pas pushimeve dhe rikthimit në punë.
Përpara se të bëhej këshilltare, Carr punonte si avokate.
“E kuptoja paksa që para se të shkoja me pushime gjërat nuk ishin në rregull dhe isha mjaft e stresuar,” thotë ajo.
“Shkova me pushime dhe më pas u ktheva, dhe papritur qaja çdo ditë. Nuk ishte thjesht çështje përshtatjeje me rikthimin; ishte një shenjë se më duhej të mendoja seriozisht për një ndryshim.”
Por si mund ta dallosh ndryshimin midis një malli të përkohshëm për mëngjeset e gjata dhe një pakënaqësie të vërtetë me punën?
“Me siguri tingëllon shumë e dukshme,” thotë Carr, “por mendoj se një nga shenjat është sa gjatë vazhdon kjo gjendje.”
“Ka rëndësi kohëzgjatja, por edhe intensiteti i ndjenjave.”
Kur je shtrirë në një shezlong në diell, mund të jetë e lehtë të fantazosh se do të lësh gjithçka dhe do të trajnohesh për t’u bërë instruktor zhytjeje ose mësues yogaje. Por Carr paralajmëron kundër një “reagimi të nxituar”.
“Ka të bëjë me marrjen e kohës dhe reflektimin se si mund të bësh një ndryshim.”
Rezervo pushimet e ardhshme dhe bëji aktive
Nuk është vetëm vetë pushimi që i bën ato kaq të këndshme dhe të dobishme. Edhe pritja dhe emocionet përpara udhëtimit luajnë një rol të rëndësishëm, thotë Dr Mark Williamson, drejtor ekzekutiv i organizatës bamirëse Action for Happiness.
Edhe lloji i pushimeve dhe kohëzgjatja e tyre mund të ndikojnë në përfitimin e përgjithshëm.
Williamson përmend atë që e quan një kërkim “vërtet befasues”, i cili sugjeron se pushimet fizike aktive mund të jenë më të mira për mirëqenien sesa thjesht qëndrimi shtrirë pranë pishinës.
“Nëse përfshin ecje, çiklizëm, not ose eksplorim, ka më shumë gjasa të kthehesh duke u ndier i çlodhur dhe i freskët,” shton ai.
Një faktor tjetër për t’u marrë parasysh është kohëzgjatja e pushimeve të ardhshme, thotë ai.
“Pushimet më të gjata japin një përfitim më të madh, por duket se ky përfitim zbehet më shpejt, pjesërisht sepse kur kthehesh përballesh me një mal më të madh detyrash.
“Ka disa dëshmi se pushimet më të shkurtra, por më të shpeshta, sjellin më shumë përfitime për mirëqenien. Freskimi që merr nga pesë ditë pushime mund të mos jetë shumë larg atij që merr nga dhjetë ditë, por pesë ditë mund t’i bësh dy herë më shpesh.”
