Instituti i Sigurimeve Shoqërore ka publikuar udhëzimet për qytetarët që duan të aplikojnë online për pension pleqërie përmes portalit e-Albania.
Aplikanti duhet fillimisht të identifikohet si “Qytetar” në portal, duke përdorur NID-in dhe Kodin e Përhershëm, si dhe kodin që dërgohet në telefon.
Më pas duhet të kërkohet shërbimi “Aplikim për pension pleqërie, suplementar pilot, suplementar lundrues i nëndetëseve apo suplementar për akademik”.
Pas hyrjes në shërbim, qytetari plotëson të dhënat personale në Seksionin I dhe zgjedh llojin e pensionit në Seksionin II.
Për pensionin e zakonshëm të pleqërisë duhet të përzgjidhet opsioni përkatës sipas nenit 31.
Në formularin elektronik plotësohen të dhënat mbi periudhat e punësimit, marrëdhëniet financiare dhe informacionet e tjera të kërkuara.
Në përfundim, aplikimi dërgohet online përmes butonit “Dërgo”.
ISSH sqaron se, nëse qytetari disponon dokumente origjinale, ato mund të bashkëngjiten gjatë aplikimit ose të dërgohen me postë pranë Drejtorisë Rajonale të Sigurimeve Shoqërore ku ka vendbanimin.
Zarfi me dokumentet duhet të shoqërohet me numrin e aplikimit të bërë në e-Albania.
Në formular ekziston edhe rubrika “Shënime”, ku aplikanti mund të shtojë informacione që i konsideron të rëndësishme për përfitimin e pensionit.
Për paqartësi, qytetarët mund të kontaktojnë ISSH në adresën kontakt@issh.gov.al ose shërbimin e ndihmës së e-Albania në helpdesk@e-albania.al.
