Nëntori u shënua nga reshje të fuqishme pas një periudhe të gjatë thatësie, duke shkaktuar përmbytje dhe dëme të mëdha në Shqipëri dhe në Ballkanin Perëndimor. Nga 3 deri më 9 nëntor, një sistem me presion të ulët solli reshje të dendura në të gjithë Mesdheun Lindor. Të dhënat e NASA-s dhe Climatebook tregojnë se në Shqipëri ranë nga 80 deri mbi 150 mm shi, ndërsa në jug u regjistruan deri në 200 mm. Më pas, stuhia Adel (24–30 nëntor) përkeqësoi situatën, me shumicën e vendit që regjistroi 60–80 mm reshje, ndërsa jugu arriti deri në 300 mm brenda një jave.
Ekstremiteti i reshjeve lidhet me ngrohjen e Detit Mesdhe, i cili më 16 nëntor 2025 paraqiti temperatura 0.2–1.7°C mbi mesataren e periudhës 1991–2020. Për pothuajse gjithë vitin 2025, temperatura e sipërfaqes së detit ka qenë mbi normalen, duke krijuar kushte më të lagështa dhe duke rritur intensitetin e reshjeve dhe erërave.
Një studim i realizuar nga Climatebook, ClimaMeter, Observatori Kombëtar i Athinës dhe Instituti francez Pierre-Simon Laplace analizoi episodin e motit të keq të datave 18–21 nëntor 2025 në Shqipëri dhe Greqi. Krahasimi me dekadat nga 1950 e deri sot tregon se ndryshimet klimatike e kanë bërë këtë lloj episodi deri në 10% më të lagësht dhe me deri në 10% erëra më të forta. Përçarja atmosferike e krijuar mbi Itali solli masa ajrore të paqëndrueshme, reshje të rrëmbyeshme, stuhi dhe përmbytje, duke shkaktuar humbje jete, qindra evakuime dhe dëme të konsiderueshme në bujqësi dhe infrastrukturë.
