Rritja e pagave dhe ulja e kostove të materialeve po shënojnë një ndryshim të dukshëm në sektorin e ndërtimit gjatë këtij viti. Sipas të dhënave më të fundit, Indeksi i Kushtimit në Ndërtim për tremujorin e tretë të vitit 2025 arriti në nivelin 114, me bazë krahasuese tremujorin e katërt të vitit 2021.
Krahasuar me të njëjtën periudhë të një viti më parë, rritja është 1.4% dhe rezulton më e ulët se 1.6% që u shënua një vit më parë, duke treguar se rritja e çmimeve në ndërtim po ngadalësohet.
Të dhënat vjetore tregojnë se shpenzimet për paga kanë pësuar rritjen më të fortë me 6.6%, duke reflektuar shtimin e kostos së fuqisë punëtore në sektor.
Pas pagave, janë rritur edhe shpenzimet për makineri dhe kostot e tjera, secila me 2.4%, ndërsa shpenzimet për transport janë rritur me 1.7%.
Në të kundërt, shpenzimet për materiale kanë rënë me 0.6%, duke ulur presionin e përgjithshëm të kostove për ndërtuesit. Brenda këtij grupi, materialet e ndërtimit dhe ato elektrike dhe të komunikimit kanë rënë me 0.6%, ndërsa materialet hidro-sanitare dhe të ventilimit kanë shënuar një ulje të lehtë prej 0.2%.
Nga krahasimi tremujor, indeksi është rritur me 0.4% ndaj tremujorit të dytë të vitit 2025. Rritja vjen kryesisht nga shpenzimet për paga, të rritura me 1.1%, si dhe nga transporti me 0.8% dhe makineritë me 0.5%. Kostot e tjera janë rritur lehtë me 0.1%.
Sërish, materiali është i vetmi grup me rënie, edhe pse minimale, me -0.1%. Brenda tij, materialet e ndërtimit kanë rënë me 0.3%, ndërsa materialet elektrike dhe të komunikimit janë rritur me 0.6%.
Indeksi i Kushtimit në Ndërtim mbetet një tregues kyç për sektorin, pasi mat ecurinë e çmimeve të materialeve, fuqisë punëtore dhe shpenzimeve të tjera kapitale që përdoren për ndërtimin e një banese tip. Ky tregues përdoret në llogaritjen e Prodhimit të Brendshëm Bruto dhe nga një sërë institucionesh, përfshirë Bankën e Shqipërisë, institucionet qeveritare dhe organizatat ndërkombëtare. /skyweb.al
