Dekada e fundit ka sjellë një transformim të ndjeshëm në teknologji dhe inovacion. Nga pak nisma të shpërndara dhe të izoluara, sot idetë novatore, talentet e reja dhe zgjidhjet praktike marrin jetë përmes startupeve, akseleratorëve dhe inkubatorëve. Por, bashkë me zhvillimin e shpejtë shtohet edhe ekspozimi ndaj rreziqeve kibernetike.
Në këtë sfond u zhvillua workshop-i “Cyber Ready”, organizuar nga AlbaniaTech në bashkëpunim me AKSK, ONE Albania, NomadTech dhe Business Magazine, mbajtur pranë One Connect Hub.
Në hapje, zv.drejtoresha e Autoritetit Kombëtar për Sigurinë Kibernetike, Floreta Faber u shpreh se siguria kibernetike duhet të ecë në të njëjtin hap me inovacionin.
“Në Shqipëri po krijohet një ekosistem fantastik për startupet, por rritja e shpejtë nuk duhet të bëhet kurrë në kurriz të sigurisë. Një incident kibernetik i vetëm mund të shkatërrojë muaj apo vite punë, prandaj siguria nuk është opsion, është detyrim themelor për çdo themelues”, tha Faber.
Gjatë sesionit, ekspertët e AKSK-së, Arbri Muça dhe Erand Elmazi, sollën shembuj konkretë, duke treguar hap pas hapi se si ndodhin incidentet kibernetike në praktikë.
Ajo që bie në sy është se shumica e problemeve, 82-90% e tyre, nuk vijnë nga sulme të sofistikuara, por nga gabime të vogla që duken të padëmshme: fjalëkalime të dobëta, shpërndarje e informacionit në kanale jo të sigurta, mungesë kontrolli mbi llogaritë cloud etj.
Pjesëmarrësit morën udhëzime të qarta për të identifikuar dobësitë në ekip, në llogaritë e tyre në rrjet apo dhe në pajisjet e punës. Ata u njohën edhe me mënyrat e reagimit në çastet e para të një incidenti, kur qetësia është aleati më i mirë. Gjatë aktivitetit u diskutua edhe qasja “Security by Design”, që në thelb nënkupton se siguria nuk vendoset në fund të procesit, por çmohet dhe ndërtohet me të që në fillesë.
Përmes nismave të tilla, ONE Albania kërkon të jetë pranë ekosistemit të startup-eve me mjete, njohuri dhe këshilla që mund të zbatohen menjëherë. Në biznes, siguria duhet të jetë kulturë pune, jo privilegj.
Vetëm me një qasje të tillë, startup-et shqiptare do të vazhdojnë të rriten mbi baza të forta dhe të palëkundshme. /skyweb.al
