Në 35-vjetorin e Lëvizjes Studentore të Dhjetorit ’90, Presidenti i Republikës Bajram Begaj ka kujtuar rolin historik të studentëve që sfiduan diktaturën dhe hapën rrugën e vendit drejt demokracisë dhe integrimit europian.
Në një mesazh të publikuar në Facebook, Presidenti thekson se data 8 Dhjetor mbetet një nga momentet më domethënëse të rrugëtimit të Shqipërisë moderne. “Si sot, 35 vjet më parë, në rrugët e Tiranës ushtoi thirrja e studentëve idealistë: ‘E duam Shqipërinë si gjithë Evropa!’. Guximi dhe lëvizja rinore e Dhjetorit ’90 i hapën rrugën Shqipërisë europiane. Çdo hap që hedhim në këtë rrugëtim nderon guximin rinor që rrëzoi perden e hekurt që e ndante Shqipërinë nga Evropa”, shkruan ai.
Presidenti Begaj nënvizon se aspirata europiane e shqiptarëve është e lidhur ngushtë me idealet e lirisë dhe demokracisë së atyre ditëve, ndërsa kujtesa për sakrificën e studentëve mbetet një prej themeleve të procesit të modernizimit dhe integrimit të vendit. /skyweb.al
