Kursi i këmbimit Euro–Lek e nisi javën me rënie të mëtejshme, duke regjistruar një minimum të ri historik.
Sipas kursit zyrtar të Bankës së Shqipërisë, Euro u këmbye të martën me 96.5 lekë, nga 96.57 lekë që ishte mbyllja e javës së kaluar (shih grafikun).
Aktorët e tregut pohojnë se presionet rënëse mbi Euron, të pranishme gjatë gjithë gjysmës së dytë të vitit, janë forcuar në dhjetor. Periudha festive sjell rritje të flukseve valutore për shkak të turizmit dhe dërgesave të emigrantëve, duke ushtruar trysni të vazhdueshme mbi monedhën europiane.
Ndërhyrjet e Bankës së Shqipërisë kanë zbutur goditjen mbi kursin, duke ruajtur një qëndrueshmëri më të madhe krahasuar me dy vitet paraardhëse. Aktualisht, rënia vjetore e Euros kundrejt Lekut mbetet më pak se 2%.
Tregu valutor reflekton ndërhyrje të shtuara nga Banka Qendrore. Të premten e kaluar u blenë 15.1 milionë euro në ankandin periodik të rezervës. Një ditë më herët, më 4 dhjetor, u krye një tjetër blerje direkte për të frenuar rënien, pasi më 3 dhjetor Euro kishte prekur një tjetër rekord negativ.
Për të dytin vit radhazi, Banka e Shqipërisë po zhvillon operacione të mëdha blerjeje për të shmangur forcimin e mëtejshëm të Lekut. Në vitin 2024 u blenë 933 milionë euro, ndërsa për nëntë muajt e parë të vitit 2025 janë blerë rreth 800 milionë euro të tjera.
Projeksionet tregojnë se dhjetori pritet të thellojë presionin mbi Euron, megjithëse ndërhyrjet e Bankës së Shqipërisë pritet të kufizojnë lëvizjet brenda një intervali të ngushtë. Një rritje e përkohshme e kursit mund të shfaqet në ditët e fundit të muajit, si pasojë e ritmit tradicional të qeverisë për të shpenzuar pjesën kryesore të deficitit buxhetor në fund të vitit.
Rritja e ofertës së Lekut nga shpenzimet e përqendruara buxhetore ka ndikim të drejtpërdrejtë në zhvlerësimin afatshkurtër të tij. Nga ana tjetër, edhe në vitin 2025 politika fiskale ka ushtruar presion mbiçmues mbi monedhën vendase. Në fund të 10-mujorit, buxheti regjistroi suficit prej 49.2 miliardë lekësh, duke ulur sasinë e Lekut në qarkullim dhe duke forcuar më tej tendencën e tij.
