Administrata Tatimore ka aktivizuar zyrtarisht Planin Operacional për sektorin e ndërtimit, i paralajmëruar që në muajin tetor, me synim forcimin e kontrollit dhe transparencës në një nga sektorët me riskun më të lartë fiskal.
Aktualisht ka nisur faza 30-ditore informuese. Përmes sistemit e-Filing, kompanitë e ndërtimit janë njoftuar për detyrimet që duhet të përmbushin, duke përfshirë deklarimin e punonjësve, pagave reale, lëshimin e faturave të fiskalizuara, kontratat e qirasë dhe përdorimin e software-ve të certifikuara të fiskalizimit. Pas përfundimit të kësaj periudhe, në janar pritet të nisin kontrollet për subjektet që nuk i përgjigjen thirrjeve të administratës.
Në njoftimin e dërguar biznesve, Tatimet theksojnë se disponojnë të dhëna nga institucione të tjera shtetërore dhe paralajmërojnë se analiza e riskut do të shërbejë për të identifikuar subjektet problematike. Mes detyrimeve të evidentuara, administrata kërkon:
- Deklarimin e çdo punonjësi të punësuar.
- Deklarimin real të pagave sipas profesionit dhe tregut të punës.
- Lëshimin e faturave të fiskalizuara për çdo transaksion.
- Blerjen e mallrave dhe shërbimeve vetëm me faturë tatimore.
- Deklarim të saktë të të dhënave në regjistrin e Tatimpaguesit.
- Përdorimin e software-ve të certifikuara të fiskalizimit.
Megjithatë, kontabilistë dhe përfaqësues të kompanive të ndërtimit e shohin komunikimin e Administratës Tatimore si një formë presioni të panevojshëm, duke thënë se njoftimet po krijojnë stres tek bizneset që operojnë rregullisht, edhe pse në përmbajtje nuk përmbajnë akuza konkrete.
Pavarësisht kritikave, drejtori i përgjithshëm i Tatimeve, Ilir Binaj, konfirmoi se kontrollet do të nisin menjëherë në janar për subjektet që nuk bashkëpunojnë gjatë fazës informuese. Ai theksoi se analiza do të fokusohet tek çmimet e shitjes, pagat e deklaruara dhe aktivitetet aktuale të kompanive.
“Do të nisim në janar me sektorin e ndërtimit. Fillojmë me një fazë informimi 30-ditore për të sqaruar çfarë kërkojmë.
Më pas, për bizneset që nuk i përgjigjen thirrjeve tona, do të zhvillohen kontrolle me fokus tek çmimet e shitjes, deklarimet e pagave dhe aktiviteti aktual,” u shpreh Binaj në një takim me Dhomën Amerikane të Tregtisë.
Ai shtoi se synimi i administratës nuk është thjesht ndëshkues, por edhe edukues dhe lehtësues, duke nënvizuar nevojën për një sistem tatimor më të drejtë dhe një përvojë më të qartë për tatimpaguesit.
Në kuadër të planit sektorial, Tatimet kanë paralajmëruar gjithashtu se do të analizojnë pagat e deklaruara në ndërtim duke i krahasuar me pagat indikative të profesioneve, për të identifikuar deklarime të dyshuara si jo reale.
Ky është aksioni më i madh i ndërmarrë nga Administrata Tatimore në sektorin e ndërtimit në vitet e fundit dhe pritet të shoqërohet me verifikime të thelluara që në fillim të vitit 2026. /skyweb.al
