Qeveria ka miratuar rritjen e pagës minimale, duke e çuar atë në 50 mijë lekë. Vendimi u mor në mbledhjen e Këshillit të Ministrave dhe do të hyjë në fuqi pas botimit në Fletoren Zyrtare, ndërsa efektet financiare do të nisin nga 1 janari 2026.
Sipas vendimit, paga minimale llogaritet për 174 orë pune në muaj, që përfaqësojnë kohën normale të punës, ndërsa paga minimale orare do të jetë 287.3 lekë.
Rritja e pagës minimale prek rreth 307 mijë e 850 punonjës të regjistruar në sektorin publik dhe privat. Qëllimi i këtij vendimi është mbrojtja e nivelit të jetesës së të punësuarve, forcimi i kapitalit njerëzor dhe përmirësimi i standardeve të jetesës për mijëra familje shqiptare.
Qeveria vlerëson se kjo masë do të ketë ndikim edhe në uljen e informalitetit në tregun e punës, si dhe në rritjen e respektimit të kontratave ligjore. Vendimi shfuqizon nivelin e mëparshëm të pagës minimale dhe është pjesë e angazhimeve për përmirësimin e kushteve ekonomike të punonjësve në vend. /Skyweb.al
