Sipas renditjes së përvitshme të TasteAtlas, kuzhina shqiptare ka bërë një përparim të dukshëm këtë vit. Ajo ka kaluar nga vendi i 96-të një vit më parë në vendin e 77-të për vitin 2025, duke u ngjitur me pothuajse 20 pozicione.
Megjithatë, pavarësisht këtij progresi, Shqipëria vazhdon të renditet ndër vendet me rezultatin më të ulët në rajon. Në Ballkan, e vetmja kuzhinë që renditet më poshtë se Shqipëria është ajo malazeze, e cila ndodhet shumë më larg në listë.
TasteAtlas vlerëson disa prej gatimeve më përfaqësuese të traditës shqiptare, si korani, fërgesa, sarma, qofte të ndryshme dhe gjiza, të cilat konsiderohen si pika të forta për vizitorët dhe adhuruesit e gastronomisë.
Ndërkohë, renditja botërore për vitin 2025 kryesohet nga Italia, e ndjekur nga Greqia. Në pesëshen më të mirë gjenden gjithashtu Peruja, Portugalia dhe Spanja.
Kështu, edhe pse kuzhina shqiptare ka bërë një hap të rëndësishëm përpara në vlerësimet ndërkombëtare, ajo ende ka potencial të madh për t’u zhvilluar dhe për të arritur nivelet më të larta të rajonit. /Skyweb.al
