Sipas të dhënave të fundit të Barometrit të Ballkanit, trafiku i rënduar dhe ndotja e ajrit janë dy shqetësimet kryesore për qytetarët shqiptarë. Rreth 55% e të anketuarve përmendin ndotjen e ajrit si problem shumë të rëndësishëm, ndërsa 48% e konsiderojnë trafikun një shqetësim prioritar. Këto dy çështje lidhen ngushtë me njëra-tjetrën dhe ndikojnë në cilësinë e jetës dhe shëndetin e njerëzve. Për shqiptarët, trafiku paraqet një problem kombëtar, ndryshe nga disa vende fqinje ku ai nuk shihet si shqetësim i tillë.
Nga barometri rezulton se që nga viti 2024 shqetësimi për trafikun është rritur ndjeshëm, për shkak të rritjes së densitetit të automjeteve dhe mungesës së infrastrukturës adekuate. Ndotja e ajrit mbetet një shqetësim i përbashkët për vendet e Ballkanit, me një përqindje të konsiderueshme të qytetarëve të preokupuar për këtë çështje. Shqiptarët janë shprehur gjithashtu të shqetësuar edhe për ndotjen e tokës dhe menaxhimin e mbetjeve.
Barometri tregon se rreth 40% e shqiptarëve kanë bërë ndryshime konkrete në rutinën e tyre të përditshme për të mbrojtur mjedisin, një përqindje më e lartë se mesatarja e rajonit. Megjithatë, faktorë si kostot dhe mungesa e informacionit të mjaftueshëm kufizojnë angazhimin më të madh të qytetarëve në sjellje miqësore ndaj mjedisit. /skyweb.al
