TikTok nuk ndjek vetëm aktivitetin tuaj brenda aplikacionit. Kompania po zgjeron mënyrat se si mbledh të dhëna edhe në faqe të tjera interneti që nuk kanë lidhje të drejtpërdrejtë me platformën. Madje, ajo mund të grumbullojë informacione për ju edhe nëse nuk keni pasur kurrë një llogari në TikTok, shkruan BBC.
Sipas një analize të kryer nga kompania e sigurisë kibernetike Disconnect, ndryshimet e fundit në mjetin e njohur si “TikTok Pixel” – një teknologji gjurmimi që vendoset në faqe interneti për qëllime reklamimi – e bëjnë mbledhjen e të dhënave edhe më të thellë dhe më ndërhyrëse.
Pixel-i është një imazh i padukshëm, me madhësinë e një pikselli, që ngarkohet në sfond kur vizitoni një faqe interneti. Ai lejon kompanitë të mbledhin informacion mbi sjelljen tuaj online, në mënyrë që t’ju shfaqin reklama të personalizuara dhe të matin efektivitetin e tyre.
Problemi lind kur këto të dhëna përfshijnë informacione të ndjeshme. Gjatë testimeve, u konstatua se disa faqe interneti dërgonin në TikTok të dhëna që lidhen me diagnoza kanceri, teste fertiliteti apo kërkesa për ndihmë në raste krize të shëndetit mendor. Në disa raste, së bashku me këto informacione transmetohej edhe adresa e email-it e përdoruesit.
Ekspertët e sigurisë e kanë cilësuar këtë praktikë si “shumë ndërhyrëse”, ndërsa TikTok thekson se përdoruesit informohen për politikat e privatësisë dhe kanë mundësi të kontrollojnë cilësimet e tyre.
Megjithatë, shumica e njerëzve mund të mos e dinë se të dhënat e tyre mund të mblidhen edhe pa qenë përdorues të aplikacionit. Çdo faqe që përdor Pixel-in dërgon informacion për të gjithë vizitorët, pavarësisht nëse ata kanë apo jo një llogari në TikTok.
Ekspertët rekomandojnë disa hapa të thjeshtë për mbrojtjen e privatësisë, si përdorimi i bllokuesve të gjurmimit (tracker blockers), rishikimi i cilësimeve të privatësisë në rrjete sociale dhe kufizimi i ndarjes së të dhënave personale online. /skyweb.al
