Prodhuesit kinezë të robotëve prezantuan makineritë e tyre më të fundit në një konferencë në Pekin të mërkurën, duke synuar të bindin investitorët dhe klientët se teknologjia po përparon drejt përdorimit më të gjerë në treg.
Më shumë se 300 kompani po marrin pjesë në Konferencën Botërore të Robotikës, e cila zhvillohet deri të dielën. Sipas autoriteteve të Pekinit, në aktivitet janë ekspozuar mbi 2,000 produkte dhe pajisje, ndërsa janë prezantuar më shumë se 150 produkte të reja.
Konferenca zhvillohet në një kohë kur robotika po shndërrohet në një front të ri të rivalitetit mes SHBA-së dhe Kinës, ndërsa entuziazmi i investitorëve për këtë sektor në Kinë ka arritur nivele të reja.
Aksionet e Unitree, prodhuesi më i njohur kinez i robotëve humanoidë, u rritën me gati gjashtëfish në debutimin e kompanisë në bursën e Shangait të mërkurën.
Pas IPO-së së suksesshme, e cila u mbishkrua me më shumë se 8,000 herë nga investitorët individualë, startup-i Lumos Robotics dhe divizioni i robotikës i Chery Automobile, eksportuesi më i madh kinez i automjeteve, i thanë Reuters se po shqyrtonin gjithashtu mundësinë e listimit në bursë.
Në ceremoninë e hapjes së konferencës, Xin Guobin, zëvendësministër i Ministrisë së Industrisë dhe Teknologjisë së Informacionit, premtoi mbështetje për zhvillimin e sektorit. Ai tha se robotika tashmë është bërë “një forcë e rëndësishme” në zhvillimin ekonomik dhe social të Kinës, raportoi Cailianshe, media financiare e mbështetur nga shteti.
Ndërsa robotët në Kinë po përdoren gjithnjë e më shumë për detyra si dërgimi i ushqimit në hotele dhe në disa linja montimi, përdorimi i tyre në shkallë të gjerë, përtej projekteve pilot, mbetet ende i kufizuar.
“Skenarët më të zakonshëm ku përdoren robotët tanë janë në logjistikë,” tha Zhang Dapeng, zëvendëspresident i kompanisë së robotëve humanoidë industrialë Leju, e cila në konferencë prezantoi robotë që lëviznin dhe sistemonin arka dhe objekte të vogla.
“Fabrikat e mëdha evropiane… si edhe fabrikat vendase të automjeteve… po përdorin robotët tanë në fabrikat e tyre, qoftë për të lëvizur kuti, për të ngarkuar komponentë të vegjël apo për të kryer detyra të tjera,” tha ai, duke shtuar se robotët e kompanisë kanë arritur të njëjtin nivel efikasiteti si një punëtor njerëzor.
Startup-i Robotera prezantoi në ekspozitë një demonstrim të një roboti humanoid për klasifikimin e pakove, me një pjesë të sipërme të trupit të montuar mbi një bazë me tri rrota.
Sipas një përfaqësuesi të shitjeve që foli për Reuters, robotët mund të funksionojnë në mënyrë të vazhdueshme për 900 deri në 1,000 orë dhe arrijnë rreth 85% të efikasitetit të një punëtori njerëzor. /skyweb.al
