Euro i është rikthyer sërish trendit rënës në tregun vendas të këmbimit, pas një forcimi të lehtë disa ditor të regjistruar menjëherë pas festave të fundvitit. Sipas të dhënave zyrtare të Bankës së Shqipërisë, gjatë ditës së sotme një euro është këmbyer mesatarisht me 96.55 lekë, pothuajse në të njëjtat nivele me ditët e festave.
Kjo lëvizje tregon se presionet mbi monedhën europiane vijojnë të mbeten të pandryshuara edhe pas largimit të emigrantëve. Një pjesë e kësaj rënieje lidhet me shpenzimet e fundvitit dhe me sasinë e madhe të euros që ka qarkulluar në treg gjatë kësaj periudhe, për shkak të kthimit të emigrantëve në vend.
Megjithatë, ky nuk konsiderohet i vetmi faktor. Sipas raporteve ndërkombëtare, tregu shqiptar vijon të karakterizohet nga një tepricë e lartë e euros, e ardhur nga burime që jo gjithmonë janë të verifikueshme, duke ushtruar presion të vazhdueshëm mbi kursin e këmbimit.
Ndryshe nga euro, paundi britanik ka shfaqur një forcim të qëndrueshëm. Gjatë ditës së sotme, një paund është këmbyer mesatarisht me 111.56 lekë, duke shënuar një rritje të ndjeshme krahasuar me ditën e mëparshme dhe duke u shkëputur nga trendi rënës i monedhave të tjera kryesore.
Ndërkohë, dollari amerikan vijon të ndjekë lëvizjet e euros. Ai është këmbyer sot rreth nivelit 82.82 lekë, duke reflektuar të njëjtën prirje të dobësimit që po shfaq monedha europiane në tregun vendas. /skyweb.al
