Shqiptarët renditen të dytët, pas rumunëve, për nga numri i komuniteteve më të mëdha të huaja që jetojnë në Itali. Sipas të dhënave të publikuara nga Eurostat mbi emigracionin, personat e lindur në Shqipëri përbëjnë 8.3% të popullsisë së huaj në këtë vend.
Vendin e parë e mbajnë të lindurit në Rumani, me rreth 900 mijë persona, ose 13.5% të totalit të komunitetit të huaj në Itali.
Një pjesë e konsiderueshme e shtetasve shqiptarë të lindur në Shqipëri janë natyralizuar ndërkohë si shtetas italianë. Eurostat raporton se numri i personave me shtetësi shqiptare në Itali është 419 mijë, shifër që përfshin persona të lindur në Shqipëri që nuk e kanë ndryshuar shtetësinë, individë të lindur jashtë Shqipërisë por me shtetësi shqiptare, si dhe emigrantë që jetojnë jashtë vendit dhe nuk janë natyralizuar. Diferenca mes numrit të të lindurve në Shqipëri dhe atyre me shtetësi shqiptare është rreth 141 mijë persona.
Italia është i vetmi shtet ku, sipas Eurostat, shqiptarët shfaqen në pesë komunitetet kryesore si sipas shtetësisë, ashtu edhe sipas vendit të lindjes së popullsisë së huaj. Ndërkohë, mungojnë të dhëna për vende si Greqia, ku jeton gjithashtu një komunitet i madh shqiptarësh, si edhe për Gjermaninë, Francën dhe Spanjën. Nga vendet për të cilat ka të dhëna, në Belgjikë jetojnë rreth 15.6 mijë persona të lindur në Shqipëri, në Suedi 10.4 mijë, në Austri rreth 7 mijë, në Holandë rreth 4 mijë dhe në Turqi rreth 3.5 mijë.
Në Slloveni, Kosova renditet si komuniteti i katërt më i madh i të huajve, me rreth 30 mijë persona të lindur në Kosovë.
Emigracioni në Europë
Sipas Eurostat, më 1 janar 2024, rreth 44.7 milionë persona të lindur jashtë Bashkimit Europian jetonin në një nga vendet anëtare, duke përfaqësuar 9.9% të popullsisë së BE-së. Ky numër është rritur me 2.3 milionë persona krahasuar me një vit më parë.
Ndërkohë, 17.9 milionë banorë të BE-së ishin të lindur në një shtet tjetër të Bashkimit Europian, shifër kjo që paraqet një rritje prej 0.2 milionë personash nga viti i kaluar.
Në terma absolutë, numri më i lartë i personave të lindur jashtë vendit u regjistrua në Gjermani (16.9 milionë), e ndjekur nga Franca (9.3 milionë), Spanja (8.8 milionë) dhe Italia (6.7 milionë). Këto katër vende përqendrojnë 66.6% të gjithë popullsisë së lindur jashtë vendit që jeton në BE, ndonëse përbëjnë 57.8% të popullsisë totale të Bashkimit.
Pesha më e lartë e popullsisë së lindur jashtë vendit ndaj popullsisë totale u regjistrua në Luksemburg, ku ajo arrin në 51.0%, e ndjekur nga Malta (30.8%), Qipro (26.9%), Irlanda (22.6%), Austria (22.1%), Suedia (20.6%) dhe Gjermania (20.2%).
Në të kundërt, më pak se 5% e popullsisë rezulton e lindur jashtë vendit në Poloni (2.6%), Rumani (3.1%), Bullgari (3.3%) dhe Sllovaki (3.9%).
