Hetimet e SPAK për skandalin e tenderave të AKSHI-t kanë dokumentuar një episod kyç që siç konstatohet në dosjen që ka parë Skyweb.al, provoi dyshimet se shoqëria “EA Solution” sh.p.k. ishte një subjekt formal, pa veprimtari reale, i përdorur për faturime dhe qarkullim financiar, ndërsa aktiviteti real kryhej nga “Soft & Solution”. Në qendër të kësaj skeme, sipas dosjes hetimore, dalin emrat e Ergys Agasi dhe Ermal Beqiri, të cilët rezultojnë të lidhur drejtpërdrejt me vendimmarrjen dhe bashkëpunimin mes dy shoqërive.
Hetimi është pjesë e operacionit të SPAK për aferën e AKSHI-t, ku deri tani janë dhënë tetë masa sigurie. Ndërkohë, Ergys Agasi dhe Ermal Beqiri rezultojnë të larguar nga vendi në kohën kur hetimet janë intensifikuar, ndërsa drejtuesja e AKSHI-t, Mirlinda Karçanaj, ndodhet nën masën e arrestit në shtëpi.
Në vijim të hetimit, më 19.06.2025, me vendim gjykate, hetuesit e BKH ushtruan kontroll në ambientet e shoqërisë “EA Solution” sh.p.k., në adresën rruga “Hoxha Tasim”, pallati 152, kati 2, Tiranë.
Gjatë verifikimeve rezultoi se në të njëjtën adresë ishte e regjistruar edhe shoqëria “INGW-T” sh.p.k. Ajo që gjetën hetuesit në zyrë u cilësua vendimtare për ecurinë e çështjes.
Në ambient ndodheshin rreth dhjetë punonjës, të cilët deklaruan se ishin punonjës të “Soft & Solution” dhe se nuk kishin asnjë dijeni për ekzistencën e “EA Solution”.
Sipas deklarimeve të administruara në procesverbal, punonjësit pohuan se ishin rekrutuar, trajnuar dhe menaxhuar nga “Soft & Solution” dhe se në atë ambient po zhvillonin sistemin e Çështjeve të Policisë së Shtetit.
Ata deklaruan se nuk kishte drejtues zyre, se hyrja bëhej përmes shenjës së gishtit dhe se çdo problematikë adresohej te burimet njerëzore ose IT-ja e “Soft & Solution”. Po ashtu, punonjësit thanë se nuk e njihnin administratoren e “EA Solution”, Ina Ciko.
Verifikimi në sistemin C@ts tregoi se vetëm një punonjëse rezultonte e regjistruar formalisht si punonjëse e “EA Solution”, ndërsa të gjithë të tjerët ishin të regjistruar te “Soft & Solution”.
Edhe kjo punonjëse deklaroi më pas se punonte në praktikë për “Soft & Solution”. Administratorja Ina Ciko, e cila mbërriti më vonë në ambient, deklaroi se “EA Solution” ishte zhvendosur prej muajsh nga ajo zyrë, se ajo merrej vetëm me financat dhe se menaxhimi i stafit kryhej nga persona të tjerë.
Gjatë kontrollit, hetuesit gjetën vetëm dokumente, kuti dhe ekstrakte të shoqërisë “Soft & Solution”, ndërsa për “EA Solution” nuk u gjet asnjë dokumentacion funksional.
Në deklarimet e saj, Ina Ciko sqaroi se ambienti dhe infrastruktura ishin marrë me qira nga “Soft & Solution” dhe se rekrutimi, trajnimi, menaxhimi i stafit dhe suporti teknik kryheshin tërësisht nga kjo shoqëri. Ajo ka deklaruar se bashkëpunimi mes dy shoqërive ishte vendosur nga ortakët dhe se për punësimet dhe nënkontraktorët vendimmarrja bëhej nga Ergys Agasi.
Në dosje del edhe emri i Arjola Koromani, e cila rezulton administratore dhe ortake e “Soft & Solution” dhe person kyç në menaxhimin e burimeve njerëzore dhe strukturës operative.
Nga verifikimi financiar, SPAK ka konstatuar se “EA Solution” ka realizuar shitje në vlerën rreth 779 milionë lekë, thuajse të gjitha me “Soft & Solution” ose shoqëri të tjera fituese tenderash nga AKSHI. Në të kundërt, blerjet rezultojnë minimale dhe nuk përputhen me volumin e shitjeve dhe natyrën e aktivitetit IT.
Nga të dhënat e punësimit rezulton se shoqëria ka pasur 10–15 punonjës, ndërsa deklarimet e tyre, të administruara në procesverbal tregojnë se kontratat formale ishin me “EA Solution”, puna reale kryhej për “Soft & Solution”, trajnimi dhe raportimi bëheshin nga kjo e fundit dhe punonjësit nuk kishin qartësi për strukturën reale të “EA Solution”.
Në vlerësimin e saj, SPAK thekson se nga tërësia e provave dhe deklarimeve krijohet dyshimi se “EA Solution” është përdorur si subjekt formal, pa veprimtari reale, për faturime dhe qarkullim financiar, ndërsa shërbimet reale kryheshin nga “Soft & Solution”.
Hetimet vijojnë për veprat penale të dyshuara që lidhen me faturime fiktive, krijim të kompanive guackë, pengim të drejtësisë dhe ndërhyrje të paligjshme në procedurat e prokurimit publik, në kuadër të dosjes së gjerë të skandalit të AKSHI-t. /skyweb.al
