Qeveria ka miratuar rishikimin e katërt të buxhetit të shtetit për këtë vit, duke përfshirë për herë të parë shpërblimin e fundvitit edhe për personat me aftësi ndryshe, kategori që nuk ishte përfshirë në aktin normativ të muajit tetor, kur u akorduan shpërblime për pensionistët.
Ministri i Financave, Petrit Malaj, bëri të ditur se shpërblimi do të jetë 15.000 lekë dhe nga ky vendim përfitojnë rreth 148 mijë persona.
Sipas Malajt, fondi total për këtë paketë mbështetëse arrin në 2.2 miliardë lekë dhe përfshin si familjet në ndihmë ekonomike ashtu edhe personat me aftësi ndryshe.
Ministri njoftoi gjithashtu se fondet e pashpenzuara nga institucionet shtetërore gjatë këtij viti do të kalojnë në llogarinë e pensioneve pranë Banka e Shqipërisë.
Sipas tij, rreth 150 milionë euro do të transferohen për skemën e pensioneve, me qëllim mbështetjen e reformës së re në këtë sektor.
Rishikimi i buxhetit parashikon edhe mbështetje shtesë për sektorë të tjerë. Fermerët do të përfitojnë 2 miliardë lekë shtesë përmes skemave mbështetëse, ndërsa 1.2 miliardë lekë shtesë janë planifikuar për pushtetin vendor.
Këto fonde do të përdoren për shlyerjen e detyrimeve të prapambetura të bashkive dhe, sipas Ministrisë së Financave, përfaqësojnë rreth 40 për qind të totalit të borxheve të pushtetit vendor. /skyweb.al
