Policia e Tiranës ka goditur një grup kriminal me 33 anëtarë, i cili ushtronte veprimtari të shpërndarjes së lëndëve narkotike në disa zona të kryeqytetit, duke përdorur metoda të kamufluara si taksi dhe motoçikleta të shpërndarjes së ushqimit.
Pas katër javësh hetime intensive, Seksioni për Hetimin e Narkotikëve, në bashkëpunim me Prokurorinë e Tiranës, ka finalizuar operacionin policor të koduar “Labirinti 2”. Sipas policisë, grupi kriminal shpërndante drogë kryesisht kokainë dhe cannabis, duke shfrytëzuar lëvizjen e lirë në qytet përmes taksive dhe motorëve të picave.
Nga hetimet ka rezultuar se Olsi Mici lëvizte me taksi për shpërndarjen e lëndëve narkotike, ndërsa Erdison Gjella përdorte një motoçikletë shpërndarjeje picash, e loguar me një brand ndërkombëtar, WOLT Albania, për të kamufluar aktivitetin e paligjshëm sipas Infonews.al.
Në mesin e personave të arrestuar është edhe një ish-ushtarak, Dylber Alijaj.
Në kuadër të operacionit janë ekzekutuar masa sigurie “Arrest në burg” për 22 persona. Gjatë periudhës hetimore janë arrestuar edhe 5 shtetas të tjerë, ndërsa 6 persona vijojnë të jenë në kërkim nga policia.
Gjatë kontrolleve të ushtruara, policia ka sekuestruar rreth 500 gramë lëndë narkotike të dyshuar kokainë, 10 kilogramë Cannabis Sativa dhe rreth 100 doza të kësaj lënde, si dhe 5 automjete, 28 telefona celularë, 6 peshore elektronike dhe 3 000 euro cash.
Në pranga kanë rënë Renaldo Dalipi, Engelbert Pjetri, Armandi Hajdini, Olsi Mici, Fatjon Cela, Xhon Boci, Laert Murataj, Artan Pullazi, Erald Sina, Blerim Mali, Gentjan Vercani, Valerjos Bushi, Olkid Hajdari, Dylber Alijaj, Angjelos Mema, Majdi Musa, Jurgen Hekurani, Erdison Gjella, Abdurahman Bollati, Klodian Rrucaj, Indri Nakaj dhe Genti Kraja.
Policia dhe Prokuroria bëjnë me dije se hetimet për këtë çështje vijojnë, me qëllim identifikimin e personave të tjerë të përfshirë dhe dokumentimin e plotë të veprimtarisë kriminale të grupit. /skyweb.al
