Mjegulla e dendur ka pushtuar prej disa ditësh Rrugën e Kombit, duke vështirësuar qarkullimin dhe duke kërkuar kujdes të shtuar nga drejtuesit e automjeteve.
Segmenti i Tunelit të Kalimashit në Kukës, një nga pikat më të frekuentuara të këtij aksi, po përballet me shikueshmëri të reduktuar si pasojë e mjegullës së dendur dhe lagështisë së shtuar, kushte që kanë qenë të pranishme prej gati një muaji. Pavarësisht situatës, deri më tani nuk janë raportuar aksidente apo incidente serioze në këtë zonë.
Autoritetet rrugore u bëjnë thirrje shoferëve të respektojnë kufizimet e shpejtësisë, të përdorin dritat e mjegullës dhe të ruajnë distancën e sigurisë për të shmangur rreziqet gjatë qarkullimit.
Sipas parashikimeve të motit, mjegulla pritet të vijojë edhe në ditët në vijim, ndërsa në zonat malore parashikohen reshje bore, përfshirë edhe zonën e kalimit kufitar. Për këtë arsye, drejtuesit e mjeteve këshillohen të planifikojnë udhëtimet me kujdes dhe të jenë të informuar për kushtet e motit përpara nisjes. /skyweb.al
