Ministria e Infrastrukturës dhe Energjisë ka reaguar ndaj raportimeve mediatike lidhur me vendimin e Këshillit Ministror të Komunitetit të Energjisë për mospërmbushjen e detyrimeve të Shqipërisë në kuadër të Traktatit të Komunitetit të Energjisë.
Përmes një deklarate zyrtare për shtyp, ministria sqaron se nuk ka ekzistuar dhe nuk ekziston asnjë vendim ndëshkues i Bashkimit Evropian apo i institucioneve të tij ndaj Shqipërisë, duke i cilësuar raportimet në disa media si të pavërteta dhe të manipuluara.
Sipas Ministrisë së Infrastrukturës dhe Energjisë, diskutimet e zhvilluara së fundmi kanë qenë vetëm në nivelin e Sekretariatit të Energjisë, një strukturë teknike e krijuar për të asistuar vendet jo anëtare të BE dhe për të nxitur përafrimin e sektorit energjetik me standardet evropiane. Gjatë mbledhjes së Sekretariatit të Energjisë, të mbajtur javën e kaluar, janë identifikuar masa të përgjithshme që duhet të përmbushen nga të gjitha vendet anëtare të Traktatit deri në korrik 2026.
Në rastin e Shqipërisë, kërkesa lidhet me përafrimin e ligjit për sektorin e energjisë me rregulloret e Bashkimit Evropian, një proces i cilësuar si normal dhe i planifikuar. Ministria thekson se projektligji dhe aktet përkatëse janë përfunduar, janë publikuar për konsultim publik dhe një pjesë e tyre janë miratuar.
Në deklaratë theksohet se paraqitja e kësaj procedure si ndëshkim apo përjashtim përbën manipulim të hapur të fakteve dhe një sulm të qëllimshëm ndaj sektorit energjetik shqiptar. Ministria sqaron gjithashtu se në asnjë raport zyrtar të Komunitetit të Energjisë nuk përmenden ndëshkime apo shkelje të lidhura me TEC-in e Roskovecit, termocentralet lundruese, rrjetet e interkonjeksionit apo projekte të tjera energjetike.
Sipas ministrisë, përfshirja e këtyre çështjeve në raportime mediatike pa bazë faktike synon dëmtimin e imazhit të Shqipërisë në fushën e energjisë dhe në procesin e integrimit evropian.
Ndërkohë, referuar vendimit të Këshillit Ministror të Komunitetit të Energjisë, Shqipëria duhet të ndërmarrë masa për korrigjimin e mangësive të evidentuara deri më 1 korrik 2026, pasi në të kundërt parashikohen masa sipas Traktatit të Komunitetit të Energjisë. /skyweb.al
