Kim Jong Un, lideri i Koresë së Veriut, ka ndjekur nga afër një test të një motori të përmirësuar me karburant të ngurtë për armë që mund të arrijnë territorin e Shteteve tw Bashkuara të Amerikës, dhe e ka cilësuar atë si një zhvillim të rëndësishëm që forcon arsenalin strategjik ushtarak të vendit, raportuan mediat shtetërore të dielën.
Ndërsa testi përputhet me qëllimin e deklaruar të Kim për të zhvilluar raketa më të lëvizshme dhe më të vështira për t’u zbuluar që synojnë SHBA-në dhe aleatët e saj, disa ekspertë mendojnë se pretendimet e Koresë së Veriut mund të jenë të ekzagjeruara.
Raketat me karburant të ngurtë janë më të lehta për t’u transportuar dhe për të fshehur lëshimet e tyre sesa ato me karburant të lëngshëm, të cilat zakonisht duhet të furnizohen me karburant përpara ngritjes dhe nuk mund të qëndrojnë gjatë në gatishmëri.
Agjencia zyrtare Korean Central News Agency (KCNA) raportoi se Kim ndoqi testin në tokë të motorit, i cili përdor materiale kompozite me fibra karboni. Sipas saj, shtytja maksimale e motorit arrin në 2,500 kilonewtonë, krahasuar me rreth 1,970 kilonewtonë të raportuara në një test të ngjashëm në shtator. KCNA tha se testi u krye si pjesë e programit pesëvjeçar të vendit për ndërtimin e armëve, që synon përmirësimin e “mjeteve strategjike të goditjes”, term që i referohet raketave balistike me kapacitet bërthamor dhe armëve të tjera.
Sipas KCNA-së, Kim deklaroi se testi i fundit i motorit ka “rëndësi të madhe në vendosjen e fuqisë strategjike ushtarake të vendit në nivelin më të lartë”. Agjencia nuk specifikoi se kur dhe ku u zhvillua testi. Sipas Lee Choon Geun, studiues nderi në Institutin e Politikave të Shkencës dhe Teknologjisë në Korenë e Jugut, raportimi i Koresë së Veriut mund të jetë “blof”, pasi nuk janë bërë publike disa të dhëna kyçe, si koha totale e djegies së motorit, shkruan AP.
Kur Koreja e Veriut raportoi për testin e mëparshëm në shtator, ajo e përshkroi atë si testin e nëntë dhe të fundit në tokë të një motori me karburant të ngurtë, që më herët ishte thënë se do të përdorej për raketa balistike ndërkontinentale. Vëzhguesit në atë kohë parashikuan se vendi do të kryente së shpejti një test-lëshim të një rakete të tillë, por kjo ende nuk ka ndodhur. /skyweb.al
