Rritja e numrit të hapave që bëni çdo ditë mund të ngadalësojë rënien kognitive tek të moshuarit që tashmë kanë shenja biologjike të hershme të sëmundjes Alzheimer, sipas një studimi të ri.
Prania e proteinave beta amiloid dhe tau janë shenja dalluese të Alzheimer-it. Amiloidi mund të fillojë të grumbullohet midis neuroneve që në të 30-tat, duke ndikuar potencialisht në komunikimin mes qelizave të trurit. Ndërsa depozitat e amiloidit rriten, ato mund të çojnë në përhapje të shpejtë të proteinave tau, të cilat formojnë gunga brenda qelizave të trurit dhe i dëmtojnë ato.
“Aktiviteti fizik mund të ndihmojë në ngadalësimin e grumbullimit të tau, proteina që lidhet më ngushtë me humbjen e memories dhe të vonojë rënien kognitive tek personat me Alzheimer të hershëm,” tha autori kryesor i studimit, Dr. Wai-Ying Wendy Yau, neurolog dhe studiues në çrregullimet e memories në Massachusetts General Hospital në Boston.
Sipas Yau, rënia kognitive u vonua mesatarisht me tre vjet tek njerëzit që ecën 3,000 deri në 5,000 hapa në ditë, dhe me shtatë vjet tek ata që ecën 5,000 deri në 7,500 hapa në ditë, shkruan CNN.
Megjithatë, mjeku neurolog Dr. Richard Isaacson, drejtori i kërkimeve në Institute for Neurodegenerative Diseases në Florida, që nuk ishte pjesë e studimit, theksoi se mbështetja tek një numër specifik hapash për të parandaluar Alzheimer-in është tepër e thjeshtë. “Nëse dikush ka yndyrë të tepërt, para-diabet, apo tension të lartë, thjesht të ecësh një numër të caktuar hapash nuk mjafton. Çdo person ka nevojë për një plan individual,” tha ai.
Isaacson shtoi se duhet të jemi të kujdesshëm me numrat e “magjikë” si 5,000 ose 7,000 hapa.
Studimi ishte i vogël, vetëm 296 persona të moshës 50 deri 90 vjeç, por përdori matje objektive, që rritën besueshmërinë e këtij studimi 14-vjeçar, i publikuar të hënën në revistën Nature Medicine.
“Forca e këtij hulumtimi është kombinimi i skanimeve të specializuara që matin depozitat e amiloidit dhe tau në tru, me vlerësime kognitive dhe numrin fillestar të hapave. Kjo është unike,” tha Masud Husain, profesor i neurologjisë dhe neuroshkencës kognitive në Universitetin e Oksfordit. Ai gjithashtu nuk ishte pjesë e studimit. /Skyweb.al
