Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim kryetaren e Bashkisë Roskovec, Majlinda Bufi, e cila akuzohet për “përdorim të funksionit publik për veprimtari politike ose zgjedhore”, parashikuar nga neni 328/a/3 i Kodit Penal.
Hetimet e SPAK zbuluan se Bufi, duke vepruar në cilësinë e kryetares së bashkisë, i ka kërkuar një qytetari, me inicialet G.B., të mos marrë pjesë në zgjedhjet vendore të 14 majit 2023 dhe të mos përfshihet në aktivitetet politike të forcave të tjera. Ngjarja u bë publike më 6 maj 2023, kur në media u publikua audio-përgjimi me titullin “Mos guxo të votosh”, që zbulonte bisedën kërcënuese të Bufit me qytetarin.
Sipas SPAK, shtetasi G.B. ishte përfitues i programit social të Bashkisë Roskovec “Përmirësimi i kushteve të banimit për familjet e varfra dhe të pafavorizuara”, të miratuar me vendim të Këshillit Bashkiak nr. 40, datë 1 mars 2022. Pavarësisht se familja e tij përmbushte kushtet për ndihmë, objekti për të cilin ishte kërkuar mbështetje rezultonte me mangësi dokumentare dhe problematika në pronësi.
SPAK thotë se Bufi ishte në dijeni të plotë për rastin e qytetarit, por pak ditë para zgjedhjeve dërgoi në banesën e tij punonjësit e Inspektoratit të Mbrojtjes së Territorit (IMT), të cilët i kërkuan ndalimin e punimeve dhe e akuzuan për ndërtim pa leje.
Pas kësaj, qytetari është thirrur në ambientet e Bashkisë, ku sipas hetimeve, Bufi e ka kërcënuar hapur që të mos marrë pjesë në zgjedhje, duke e paralajmëruar për pasoja nëse nuk bindet. Ajo i ka kujtuar edhe mesazhet që ai i kishte dërguar më parë, ku i uronte fitore kandidatit të opozitës, duke e konsideruar këtë si arsye për ta ndëshkuar.
Në bisedën e regjistruar, Bufi i është drejtuar qytetarit me fjalët:
“Që nga ky moment e deri sa të mbarojnë zgjedhjet, të mos hapësh gojë, të mos flasësh as ti, as familja jote, të rrish në shtëpi dhe të mos shkosh fare të votosh në zgjedhjet e 14 majit.”
SPAK konstaton se kjo kërkesë është bërë nën kërcënim dhe në kundërshtim të plotë me vullnetin e qytetarit, duke shfrytëzuar pozicionin e saj publik për qëllime politike. Megjithatë, sipas dosjes hetimore, G.B. ka ushtruar të drejtën e tij të votës, pavarësisht presionit.
Dosja tashmë i ka kaluar Gjykatës së Posaçme Kundër Korrupsionit dhe Krimit të Organizuar (GJKKO), e cila pritet të caktojë datën e parë të seancës gjyqësore ndaj Majlinda Bufit, një rast që vë sërish në qendër të vëmendjes përdorimin politik të pushtetit lokal në prag zgjedhjesh. /skyweb/al
