Raportimi mediatik në Shqipëri vijon të mbetet kryesisht i parcelizuar, një fenomen që lidhet me probleme strukturore të tregut mediatik, presionet ekonomike dhe mënyrën se si konsumohet informacioni. Në shumicën e rasteve, audienca ndalet vetëm te titulli dhe hyrja e lajmit, pa e ndjekur historinë deri në fund, duke bërë që ngjarje komplekse të mos kuptohen në thelbin e tyre.
Si u zhdukën nën hundën e doganave verërat 100-vjeçare të Ergys Agasit, Dorian Doka i doganave hesht
Ky problem po reflektohet qartazi edhe në reagimin e opinionit publik ndaj një prej skandaleve më të mëdha të hetuara ndonjëherë në Shqipëri, dosjes së AKSHI-t, e zbërthyer nga Prokuroria e Posaçme nën drejtimin e prokurorit Bledar Maksuti. Përmasat reale të kësaj dosjeje dhe mënyra se si funksiononte skema kriminale shpesh humbasin mes raportimeve fragmentare dhe leximit sipërfaqësor.
Sipas hetimeve, bëhet fjalë për një grup të strukturuar kriminal që kishte ndërtuar një mekanizëm të brendshëm për ndarjen e tenderave të AKSHI-t, pra të parave publike. Kjo skemë shtrihej nga ndarja e “llokmave” në zyra, deri te përdorimi i presionit dhe dhunës për të eliminuar rivalët në biznes, përfshirë edhe marrjen peng të kundërshtarëve.
FOTO/ SPAK zbulon jahtin luksoz të Ermal Beqirit, mjeti në emër të punonjëses së “Soft & Solutions”
Një nga episodet më të forta të dosjes është ai i Gerond Meçes, i cili për shkak të rrëmbimit mund të perceptohet në mënyrë të gabuar si viktimë. Në realitet, dosja nuk flet për viktima, por për zhvatës. Gerond Meçe rezulton deri tani si përfituesi më i madh i tenderave të AKSHI-t, me rreth 55 milionë euro, duke lënë pas Ermal Beqirin, i cili përmes kompanive “Soft & Solution” dhe “Horizon” ka përfituar mbi 40 milionë euro.
Hetimet tregojnë se deri rreth dy vite më parë, Gerond Meçe kishte një pozicion dominues në skemë, rol që sot i atribuohet Ermal Beqirit në bashkëpunim me Ergys Agasin.
Për arsye që ende nuk janë bërë publike, marrëdhënia mes tyre u prish dhe në “pole position” kaloi grupi Beqiri–Agasi. Si reagim ndaj kësaj humbjeje influence, Gerond Meçe nisi të ankimonte sistematikisht tenderat në Komisionin e Prokurimit Publik, duke tentuar bllokimin e gjithë procesit.
Ky veprim çoi në një përshkallëzim të konfliktit brenda vetë skemës, duke kulmuar me rrëmbimin e Meçes dhe detyrimin e tij për t’u tërhequr nga ankimimet.
Një episod që nxjerr në pah se përplasja nuk ishte mes ligjit dhe paligjshmërisë, por mes aktorëve të së njëjtës skemë, që po luftonin për kontrollin e parave publike.
Dosja AKSHI tregon një realitet brutal, ku edhe gjatë vjedhjes, palët nuk presin momentin e ndarjes, por kacafyten gjatë procesit.
Një histori e ndërlikuar, e cila për të kuptuar përmasat reale kërkon lexim të plotë dhe jo thjesht konsumim të titujve, në një kohë kur raportimi i fragmentarizuar po e zbeh kuptimin e një prej aferave më të rënda të viteve të fundit. /skyweb.al
