E mërkura e 31 dhjetorit pritet të shënojë ditën më të ftohtë të vitit 2025, me temperatura që në zonat malore do të zbresin deri në -8 gradë Celsius. Sipas sinoptikanëve, kjo ditë do të përkojë edhe me natën e ndërrimit të viteve, duke sjellë kushte të ashpra dimërore në pjesën më të madhe të vendit.
Sinoptikania Lajda Porja sqaron se vala e të ftohtit do të ndihet më fort në verilindje, ku termometri do të shënojë vlerat më të ulëta. Bajram Curri, Puka, Peshkopia dhe Bulqiza pritet të regjistrojnë temperatura nga -5 deri në -8 gradë Celsius. Edhe zonat e juglindjes, përfshirë qarkun e Korçës, do të përballen me temperatura të ulëta, që do të luhaten nga -5 deri në -6 gradë. Ndërkohë, në zonat bregdetare temperaturat minimale do t’i afrohen 0 ose 1 gradë Celsius, ndërsa në shumë qytete të zonës së ulët parashikohen vlera nga -3 deri në -4 gradë.
Pas ditëve me mot të kthjellët, fundjava pritet të sjellë një ndryshim të ndjeshëm të kushteve atmosferike. Sipas parashikimeve, e premtja, e shtuna dhe e diela do të karakterizohen nga rikthimi i reshjeve në territorin e vendit.
Dita e premte pritet të sjellë reshje dëbore në të gjitha zonat malore, ndërsa bora do të zbresë edhe në zona kodrinore dhe malore pranë Tiranës, Krujës dhe Librazhdit. Të shtunën, për shkak të një rritjeje graduale të temperaturave, reshjet do të jenë kryesisht në formë shiu.
Sipas sinoptikanëve, edhe javët e para të janarit do të shoqërohen me mot të paqëndrueshëm dhe temperatura të ulëta, duke mbajtur në fuqi kushtet tipike të dimrit në të gjithë vendin. /skyweb.al
