Çdo informacion mbi projektin “Durana Tech Park” është fshirë nga faqja zyrtare e Korporatës së Investimeve Shqiptare, pa asnjë njoftim apo shpjegim publik.
Nga verifikimet e kryera prej skyweb.al sot në mëngjes rezulton se çdo informacion mbi këtë projekt nuk është më i aksesueshëm, ndërkohë që figuron në Google, duke ngritur dyshime serioze mbi transparencën dhe arsyet e zhdukjes së të dhënave.
“Durana” ishte shpallur si zonë e lirë për zhvillimin e teknologjisë, me status të posaçëm ligjor dhe fiskal. Ky status u lejonte kompanive të regjistruara si përdoruese të përfitonin përjashtime të gjera nga taksat dhe kontributet, edhe në rastet kur aktiviteti real nuk zhvillohej fizikisht në këtë zonë.
Kompani të lidhura me Ermal Beqirin dhe Ergys Agasin kanë regjistruar “Duranën” si vend ushtrimi aktiviteti, duke përfituar lehtësira fiskale dhe duke shmangur pagesën e detyrimeve tatimore.
Kjo praktikë e ka kthyer projektin në një mekanizëm që funksionon si parajsë fiskale brenda territorit të Shqipërisë.
Çështja e “Duranës” lidhet drejtpërdrejt edhe me denoncimet publike të ish-zëvendëskryeministrit Arben Ahmetaj, i cili ka folur për ekzistencën e skemave të strukturuara për shmangien e taksave në sektorin e teknologjisë, përmes lidhjeve mes kompanive private dhe institucioneve shtetërore.
Ndërkohë, prokurori i SPAK Bledar Maksuti zbërtheu më herët një mega-skemë korrupsioni me tenderët e AKSHI-t përmes kompanive të Ergys Agasit dhe Ermal Beqirit.
“Durana” dyshohet si një hallkë e mundshme e së njëjtës skemë, ku përfitimet fiskale dhe regjistrimet formale përdoren për të shmangur detyrimet ndaj shtetit, prandaj edhe fshirja nga Elira Kokona e projektit fill pas shpërthimit të skandali sjell dyshime të mëdha mbi shkaqet.
Fshirja e projektit nga faqja e Korporatës së Investimeve vjen në një moment kur presioni publik dhe institucional mbi skemat e lidhura me sektorin e IT-së është rritur ndjeshëm.
Deri tani nuk ka asnjë reagim zyrtar nga Korporata e Investimeve Shqiptare apo nga drejtuesja e saj, Elira Kokona, për arsyet e zhdukjes së informacionit mbi “Durana Tech Park”. /skywebal
