Kryeministri Edi Rama ka dalë hapur në mbrojtje të drejtoreshës së AKSHI-t, Mirlinda Karçanaj, ndaj së cilës SPAK ka caktuar masën e sigurisë arrest shtëpie, nën akuzën e shkeljes së barazisë në tendera.
Gjatë konferencës së fundit për mediat për këtë vit, Rama u shpreh se ka respekt maksimal për Karçanajn, duke theksuar rolin e saj në strukturimin dhe funksionimin e Agjencisë Kombëtare të Shoqërisë së Informacionit.
DOSJA/ Dalin bisedat “private” të Mirlinda Karçanajt me Ergys Agasin
Sipas kryeministrit, hetimet janë ende në proces dhe ai nuk ka dijeni për detaje konkrete, ndaj nuk komenton, siç u shpreh, gjysmë të vërteta që qarkullojnë publikisht. Rama tha se në krye të AKSHI-t ndodhet një grua që gëzon respektin e tij të plotë dhe se e njeh prej më shumë se 20 vitesh.
“Kjo është pjesë e hetimeve. Nuk kam dijeni për këtë dhe nuk mund të bëj asnjë koment për gjysmë të vërtetat që dalin lart e poshtë.
Është proces dhe do të bëhen hetime. Në krye të skuadrës së AKSHI-t është një grua që ka respektin tim të padiskutueshëm. Linda Karçanaj ka një masë sigurie dhe jeton në një shtëpi me qira.
Më parë ka jetuar në një banesë postkomuniste, në shtëpinë e prindërve të saj. E njoh prej 20 vitesh dhe ka respektimin tim”, deklaroi Rama.
Megjithatë, sipas VNA, Mirlinda Karçanaj nuk rezulton të ketë deklarim pasuror as në ILDKPKI dhe as në platformën Open Spending Albania.
Deklarimi i pasurisë është një detyrim ligjor për çdo zyrtar shtetëror, veçanërisht për një funksionare që ka mbajtur postin e drejtoreshës së AKSHI-t për rreth tetë vite.
Në këtë kontekst, ngrihen pikëpyetje nëse mungesa e deklarimit pasuror lidhet me një mosveprim të ILDKPKI-së për të kërkuar zbatimin e ligjit, apo nëse bëhet fjalë për një përjashtim të pashpjeguar nga ky detyrim. Në të dyja rastet, situata kërkon një sqarim institucional. /skyweb.al
