E cilësuar si “perla” e Alpeve Shqiptare, Lëpusha në Malësi të Madhe vazhdon të jetë një destinacion tërheqës për vizitorët gjatë gjithë vitit.
E rrethuar nga male madhështore, me bllokun shkëmbor të Shënikut në Bjeshkët e Namuna dhe vargjet malore përreth, zona dallohet për kullotat e gjelbra, pyjet e dendura dhe natyrën e paprekur.
Kryeministri Edi Rama ndau sot pamje nga malet e Lëpushës, në zemër të Malësisë së Madhe, duke vënë në pah qetësinë e peizazhit alpin, ku natyra ruan ritmin e saj dhe fton vizitorët drejt eksplorimit ekoturistik dhe përvojave autentike.
Malësia e Madhe po shndërrohet gjithnjë e më tepër në një pikë referimi për turizmin malor dhe familjar, duke tërhequr si vizitorë vendas ashtu edhe turistë të huaj në çdo stinë.
Pasuria natyrore, mikpritja tradicionale dhe zhvillimi i agroturizmit e rendisin zonën ndër destinacionet më premtuese për turizmin e qëndrueshëm në Shqipëri. Veçanërisht, ajo tërheq vizitorë që preferojnë alpinizmin, aventurën, sportet dimërore dhe eksplorimin e natyrës. /skyweb.al
