Pas ndërhyrjes për riparimin e defektit në tubacionin kryesor, Drejtori i Ujësjellësit Vlorë, Ermal Murati, deklaroi se situata e furnizimit me ujë në qytet po shkon drejt normalizimit të plotë dhe pritet të stabilizohet brenda orëve të pasdites.
Sipas Muratit, pajisja e dëmtuar është tashmë funksionale dhe një pjesë e qytetit ka nisur të furnizohet me ujë, ndërsa depot po mbushen gradualisht për të garantuar shpërndarjen në të gjithë territorin urban.
“Pajisja e vendosur tashmë është në rregull. Një pjesë e qytetit po furnizohet, ndërsa depot janë duke marrë ujë. Brenda orëve të pasdites i gjithë qyteti do t’i kthehet normalitetit. Ishte një dëmtim shumë i rëndë, por tashmë mund të themi se jemi në fund të avarisë”, u shpreh Murati.
Ai theksoi se në menaxhimin e situatës ka pasur angazhim maksimal nga të gjitha strukturat përkatëse, përfshirë AKUK, Bashkinë e Vlorës dhe institucionet qendrore.
“Pati një angazhim maksimal nga të gjithë. Kërkoj ndjesë qytetarëve për problematikën e krijuar. Më pas do të ketë edhe një vlerësim të plotë për të gjithë këtë situatë”, deklaroi drejtori i Ujësjellësit Vlorë.
Defekti në tubacion shkaktoi ndërprerje të furnizimit me ujë për disa zona të qytetit, duke krijuar vështirësi për banorët, ndërsa ndërhyrja u cilësua si teknike dhe e ndërlikuar për shkak të përmasave të dëmtimit. /skyweb.al
