Vendimi i qeverisë për rritjen e pagës minimale ka nisur zbatimin, duke ndryshuar ndjeshëm kufirin minimal të pagesës për punonjësit në Shqipëri. Nga 1 janari 2026, paga minimale mujore për efekt deklarimi rritet nga 40 mijë në 50 mijë lekë.
Sipas të dhënave zyrtare, masa prek rreth 307 mijë e 850 punonjës të regjistruar, si në sektorin publik ashtu edhe në atë privat, duke u kthyer në një nga ndërhyrjet më të gjera në tregun e punës vitet e fundit.
Për të shmangur barrën financiare mbi biznesin, qeveria ka vendosur që gjatë 9 muajve të parë të zbatimit, kostoja shtesë e sigurimeve shoqërore dhe shëndetësore të përballohet nga buxheti i shtetit. Për këtë qëllim është parashikuar një fond prej 1 miliard lekësh, i cili do të përdoret për kompensimin e kontributeve që lindin nga rritja e pagës minimale.
Autoritetet argumentojnë se ky hap pritet të ndikojë pozitivisht në formalizimin e tregut të punës, duke reduktuar punësimin informal dhe duke forcuar zbatimin e kontratave ligjore mes punëdhënësve dhe punëmarrësve.
Rritja e pagës minimale është pjesë e një politike të ndjekur ndër vite. Në vitin 2017, paga minimale ishte 24 mijë lekë, ndërsa pas rritjeve graduale, ajo arrin në 50 mijë lekë në vitin 2026, duke u dyfishuar brenda një dekade. Sipas projeksioneve afatmesme të qeverisë, synimi është që paga minimale të shkojë në 60 mijë lekë deri në vitin 2028, në përputhje me zhvillimet ekonomike dhe koston e jetesës.
