Teksa përmbajtjet e rreme të krijuara me inteligjencë artificiale po shtohen me shpejtësi në internet, Finlanda ka vendosur të forcojë mbrojtjen përmes arsimit.
Qeveria finlandeze ka integruar edukimin për inteligjencën artificiale në kurrikulën shkollore, me synimin që edhe fëmijët që nga mosha tre vjeç të mësojnë të njohin lajmet e rreme dhe dezinformimin.
Lufta kundër lajmeve të rreme në Finlandë nis që në kopshte. Prej dekadash, sistemi arsimor finlandez ka përfshirë edukimin mediatik si pjesë të programit kombëtar, duke i mësuar nxënësit të analizojnë përmbajtje të ndryshme dhe të identifikojnë dezinformimin që në moshë shumë të vogël.
Ky program është pjesë e një strategjie të gjerë për të rritur rezistencën e shoqërisë ndaj propagandës dhe lajmeve të pavërteta, veçanërisht atyre që vijnë përtej kufirit 1 340 kilometra të Finlandës me Rusinë.
Pas pushtimit të Ukrainës dhe shtimit të fushatave të dezinformimit në Evropë, autoritetet finlandeze kanë vendosur të shtojnë edhe edukimin për inteligjencën artificiale në shkolla.
Sipas autoriteteve arsimore, aftësia për të kuptuar dhe analizuar informacionin është një kompetencë themelore qytetare.
“Edukimi mediatik është thelbësor për sigurinë e vendit dhe për mbrojtjen e demokracisë,” thonë përfaqësues të arsimit në Helsinki.
Në shkollat fillore, nxënësit mësojnë të dallojnë lajmet e rreme duke analizuar tituj, tekste, foto dhe video. Tashmë, mësimi është zgjeruar edhe te identifikimi i përmbajtjeve të krijuara nga inteligjenca artificiale, si imazhe apo video që duken reale, por nuk janë.
Edhe media finlandeze janë pjesë aktive e këtij procesi. Çdo vit organizohet “Java e Gazetave”, ku nxënësit njihen drejtpërdrejt me përmbajtje të verifikuara.
Ndërkohë, një libër i posaçëm për edukimin mediatik u është shpërndarë të gjithë nxënësve që nisin arsimin e mesëm, me synimin për t’i pajisur ata me mjete konkrete për të dalluar informacionin e besueshëm nga ai i rremë.
Edukimi mediatik është pjesë e kurrikulës finlandeze që nga vitet ’90 dhe ofrohet edhe për të rriturit, të cilët shpesh konsiderohen më të ekspozuar ndaj dezinformimit. Falë kësaj qasjeje afatgjatë, Finlanda renditet vazhdimisht në krye të Indeksit Evropian të Edukimit Mediatik.
Zyrtarët finlandezë pranojnë se përhapja e inteligjencës artificiale e ka bërë shumë më të vështirë dallimin mes së vërtetës dhe së rremes.
Megjithatë, ata theksojnë se arsimi është mbrojtja më e fortë.
Synimi është që brezat e rinj të rriten me aftësinë për të menduar kritikisht, në një kohë kur dezinformimi po sfidon drejtpërdrejt demokracinë dhe institucionet publike. /euronews.com
