Vetëm pak ditë pas zhdukjes së verërave luksoze të sekuestruara në vilën e biznesmenit Ergys Agasi në Lundër, qeveria ka nxjerrë një urdhër të ri që vendos nën kontroll të plotë çdo litër verë që qarkullon në Shqipëri.
Ngjarjet në pamje të parë nuk kanë lidhje me njëra-tjetrën, megjithatë duhet theksuar se njëurdhë i tillë nga Ministria e Bujqësisë vjen fill pas zhdukjes së verës së Agasit nën hundën e doganave.
SPAK dhe BKH kishin sekuestruar verëra të shtrenjta, me vlerë miliona euro, në pronën e Agasit në Lundër. Vera ishte lënë nën mbikëqyrjen e institucioneve shtetërore, përfshirë policinë dhe doganat.
Por gjatë natës, sasia e madhe e verës është zhdukur pa lënë gjurmë. Deri më tani, nuk ka një shpjegim zyrtar për ngjarjen apo kush mban përgjegjësi për “avullimin”e verës dhe prishjen e provave të SPAK.
Regjistri i shpallur sipas urdhrit të Ministrisë së Bujqësisë, do të shënojë çdo lëvizje të produktit, duke nisur nga hyrja e rrushit për prodhim, procesi i përpunimit, trajtimet teknike, magazinimi, deri te dalja në treg apo transporti i verës.
Sipas urdhrit, çdo operator që prodhon, përpunon apo tregton verë do të jetë i detyruar të regjistrojë me detaje çdo sasi, çdo veprim dhe çdo humbje, përfshirë edhe avullimin gjatë magazinimit.
Regjistri do të mund të mbahet në formë fizike ose elektronike dhe do të shërbejë si bazë për kontrolle administrative dhe fiskale.
Ndërsa kantinat dhe prodhuesit e verës do të duhet të justifikojnë çdo litër të humbur apo të avulluar, rasti i verërave të sekuestruara të Agasit mbetet pa përgjigje. /skyweb.al
