Kryeministri Edi Rama ka reaguar me ironi në rrjetet sociale lidhur me përmbytjet e shkaktuara nga reshjet e dendura të ditëve të fundit, të cilat kanë prekur jo vetëm Shqipërinë, por edhe disa vende të rajonit dhe Europës.
Në një postim publik, Rama shprehet se nuk e kupton pse ende nuk po fajësohet ai, qeveria apo Bashkia e Durrësit edhe për reshjet e forta që kanë goditur Italinë, Greqinë, Malin e Zi dhe Kroacinë.
“Nuk e kuptoj pse nuk po më fajësojnë akoma mua, qeverinë dhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë.
Çudi e madhe. Opozitat andej, po të paktën të fajësonin qeveritë e tyre, po hiç, asnjë llaf”, shkruan Rama.
Reagimi i kryeministrit vjen në një kohë kur përmbytjet kanë shkaktuar dëme të konsiderueshme materiale dhe ndërprerje të jetës normale në disa shtete të Europës Jugore, ndërsa në Shqipëri debati publik është fokusuar te përgjegjësitë institucionale për menaxhimin e situatave emergjente. /skyweb.al
