“Albbakër” sha ka shpallur një ankand publik për shitjen e makinerive, pajisjeve industriale dhe skrapit të hekurit që ndodhen në repartet e ish-Uzinës së Rafinimit të Bakrit në Rubik. Ankandi do të zhvillohet më 26 qershor 2025, ora 12:00, në ambientet e Ministrisë së Ekonomisë, Kulturës dhe Inovacionit në Tiranë.
Sipas njoftimit zyrtar në Buletinin e Agjencisë së Prokurimit Publik, objekti i shitjes përfshin një sasi të konsiderueshme pajisjesh industriale të instaluara në periudhën 1966–1980, të cilat kanë qëndruar të papërdorura që nga ndërprerja e aktivitetit në vitin 1999.
Shitja bëhet “siç janë”, në gjendjen aktuale fizike dhe teknike, pa garanci për funksion apo rikuperim. Asetet janë të amortizuara rëndë për shkak të kushteve atmosferike dhe mungesës së mirëmbajtjes.
Vlera fillestare e ankandit është caktuar në 19,223,618 lekë (pa TVSH). Të drejtë pjesëmarrjeje kanë vetëm subjektet juridike me eksperiencë mbi tre vite në çmontim, transport dhe përpunim të pajisjeve industriale, që përmbushin kriteret e vendosura nga autoriteti shitës.
Ky ankand zhvillohet menjëherë pasi qeveria shqiptare vendosi t’i kalojë truallin dhe asetet e mbetura të “Albbaker” kompanisë “KAYO”, e cila operon në sektorin e prodhimit të armëve. Vendimi i qeverisë u justifikua me nevojën për nxitjen e industrisë së mbrojtjes dhe investimeve strategjike në zonën e Rubikut, ndërkohë që pajisjet e mbetura industriale po likuidohen përmes ankandit.
Kështu, ndërsa kompania “KAYO” përfiton asetet tokësore të ndërmarrjes, pjesa tjetër, përfshirë makineritë dhe strukturat metalike, shitet për skrap në treg të hapur.
Shitja e pasurive të “Albbaker” vjen në një klimë të thellë dyshimi dhe pakënaqësie mbi mënyrën sesi trajtohen njësitë ekonomike të trashëguara nga komunizmi. Fillimisht të dhëna me koncesione të dështuara, këto asete përfunduan të mbingarkuara me borxhe ndaj shtetit dhe më pas u likuiduan për vlera simbolike. Rasti i rafinerisë së naftës në Cërrik dhe ai i ARMO-s janë shembuj të qartë: asgjë nuk u rivitalizua, por gjithçka u shkatërrua dhe u nxor në ankand në kushte të dyshimta.
Vetëm pak muaj më parë, Skyweb.al raportoi për një tjetër skandal në procesin e shitjes së tokës së ish-rafinerisë së Cërrikut nga “Petrol Alba” sh.a., ku Komisioni i Prokurimit Publik konstatoi shkelje serioze dhe e anuloi tërësisht procedurën për shkak të manipulimit të garës në favor të kompanisë “Alb Building”.
Kjo kompani, me lidhje të fuqishme me tenderët publikë, është akuzuar më parë për shkelje të ligjit për pastrimin e parave dhe përfitime të dyshimta nga fondet shtetërore. /skyweb.al
