Hetimet e SPAK kanë nxjerrë në dritë një tjetër mekanizëm përfitimi në dosjen e AKSHI-t, ku përveç parave dhe pasurive të paluajtshme, në qendër dalin edhe verërat e shtrenjta të gjetura në vilën e Ergys Agasit në ambientet e “Equos Resort”.
Sipas materialeve hetimore dhe vendimit të Gjykatës, Agasi nuk rezulton të ketë paguar asnjë qindarkë për këto pije luksoze. Ato dyshohet se përbënin një formë shpërblimi nga kompani që kishin përfituar tendera nga AKSHI, konkretisht “Soft & Solution” shpk e lidhur me Ermal Beqirin, “Fastech” shpk e Andis Papës, “First” shpk e Gëzim Hoxhës dhe subjekte të tjera të lidhura me to.
Vlera e këtyre përfitimeve, sipas hetimit, dyshohet të kalojë mbi 950 mijë euro.
Një faturë e gjetur mbi arkat me verë dhe shampanjë në një nga vilat e Agasit në Qerret çoi hetuesit drejt identifikimit të furnizuesit: shoqëria “Fast & Fresh”, në pronësi të Andis Papës, njëkohësisht pronar i “Fastech”, kompani përfituese e tenderave publikë në AKSHI.
Të dhënat tregojnë se vetëm për periudhën Tetor 2024 – Nëntor 2025, “Fast & Fresh” ka importuar pije në vlerën 1,130,265 euro. Ndërsa për periudhën Nëntor 2024 – Dhjetor 2025, ky subjekt ka faturuar blerje ndaj “Fastech” dhe “Soft & Solution” në vlerën 94,423,883 lekë, ose mbi 950 mijë euro.
Hetimi përforcon dyshimin se kjo nuk ishte një marrëdhënie tregtare normale, por pjesë e një skeme më të gjerë për qarkullimin e përfitimeve nga tenderat publikë.
Sipas SPAK, paralelisht me këto përfitime në formë luksi, kompanitë pjesë e kësaj skeme pranonin edhe fatura për shërbime fiktive nga shoqëria “EA Solution”, në pronësi të Ergys Agasit. Kjo kompani, sipas hetimit, nuk ka ofruar asnjë shërbim real, por përdorej si një kanal për të justifikuar pagesat.
Skema funksiononte në mënyrë të strukturuar: kompanitë fitonin tendera nga AKSHI, më pas pranonin fatura nga “EA Solution” për shërbime të paekzistuara dhe kryenin pagesa në favor të saj. Në këmbim, përveç këtyre pagesave, Agasi përfitonte edhe forma të tjera shpërblimi, si verëra të shtrenjta dhe produkte luksi.
Deklarimet e Andis Papës para hetuesve përforcojnë këtë mekanizëm. Ai ka pranuar se verërat e importuara nga kompania e tij “Fast & Fresh” kanë qenë kryesisht porosi të Arjola Koromanit, administratore e “Soft & Solution”, kompani e lidhur me Ermal Beqirin.
Pagesat bëheshin fillimisht përmes bankës dhe më pas edhe në cash, ndërsa produktet i jepeshin pa fitim, vetëm për shkak të marrëdhënies së bashkëpunimit.
Ky zinxhir transaksionesh përputhet edhe me gjetjet gjatë kontrollit në vilën e Agasit ku u konstatuan qindra shishe verë të kuqe të ngjashme me ato të importuara nga “Fast & Fresh”.
Megjithatë, afro 600 shishe të sekuestruara fillimisht rezulton se janë zhdukur më pas, pasi Dogana ishte ngarkuar me bllokimin e mallit pa pullë fiskale.
Të gjitha këto elemente, sipas SPAK, përbëjnë një skemë të mirëorganizuar korrupsioni dhe pastrimi parash, ku përfitimet nga fondet publike riktheheshin në forma të ndryshme tek personat kyç të vendimmarrjes, duke përfshirë pagesa të maskuara dhe shpërblime në natyrë. /skyweb.al
