Prokuroria e Posaçme dhe agjentët e Byrosë Kombëtare të Hetimit kanë zgjeruar hetimet ndaj një grupi të dyshuar kriminal të përfshirë në trafik droge dhe pastrim parash.
Pjesë e hetimit janë biznesmeni Artur Shehu, Artur alias Luçiano Koçeku, Alfredo Hamzai, Ilir Shtufi, Orest Sota dhe Orgest Birçaj. Sipas dosjes hetimore, paratë e përfituara nga aktiviteti kriminal dyshohet se investoheshin kryesisht në biznese, ndërtime dhe projekte të mëdha zhvillimi.
Në kuadër të hetimeve dhe me miratimin e gjykatës, BKH ka ushtruar kontrolle pranë Këshillit Kombëtar të Territorit, ku janë sekuestruar dhjetëra dosje që lidhen me kompanitë e përfshira në çështje.
Praktikat e marra nga hetuesit kanë të bëjnë me leje ndërtimi për kulla, resorte dhe projekte që kanë përfituar ose kanë kërkuar statusin e investimit strategjik.
Sipas weblajm, dosjet lidhen me ndërtime në disa prej zonave më të lakmuara të vendit, përfshirë Palasën, Gjirin e Lalzit, Vlorën, Tiranën dhe zona të tjera të bregdetit shqiptar.
Hetimet pritet të përcaktojnë nëse projektet dhe kompanitë e përfshira janë përdorur për futjen në ekonomi të parave të dyshuara si të ardhura nga trafiku i drogës. Skema dyshohet se është dokumentuar edhe përmes komunikimeve të zbërthyera nga platforma e enkriptuar Sky ECC.
