Policia e Shtetit ka zbarkuar këtë të mërkurë në ambientet e “Equos Resort”, ku po zbatohet një vendim për sekuestrimin e pasurive të Ergys Agasit, në kuadër të hetimeve të zgjeruara për dosjen e AKSHI-t.
Në fokus të këtij operacioni janë disa vila brenda kompleksit, për të cilat dyshohet se janë legalizuar në emër të Ergys Agasit në kundërshtim me ligjin përmes Dallandyshe Bicit bashkë edhe me disa mabiente të tjera në hyrje të resortit turistik.
Vila, 5 ha tokë dhe dyqane në emër të Ergys Agasit! Për çfarë u pyet Dallëndyshe Bici në SPAK
Sipas burimeve, këto prona kanë qenë më herë pjesë e “Equos Resort”, por dyshohet se janë kaluar në emër të Agasit përmes një skeme që përfshin ndërhyrje në proceset e legalizimit gjatë periudhës kur Agasi mori administrimin “de facto” te kompleksit përmes njerëzve të tij të besuar.
Krahas kësa, SPAK ka të dhëna se Agasi ka kaluar në emër të tij dhjetëra mijëra metra katrorë tokë pyll përreth kompleksit, sërish me ndihmën e Dallandyshe Bicit.
Hetimet kanë ngritur pikëpyetje serioze mbi rolin e ish-drejtoreshës së Kadastrës, Dallandyshe Bici, e cila dyshohet se ka ndihmuar në zhvatjen dhe kalimin e këtyre pasurive në pronësi të Agasit përmes procedurave të kontestuara ligjore.
Zhvillimet vijnë vetëm një ditë pasi SPAK njoftoi sekuestrimin e një sërë pasurish me vlerë miliona euro në emër të Mirlinda Karçanajt, Ergys Agasit dhe Ermal Beqirit. Vendimi i Gjykatës së Posaçme përfshin një portofol të gjerë pasurish në Tiranë, Durrës, Vlorë dhe zona të tjera, që përfshijnë apartamente, truall, pyje, ndërtesa, vila, automjete luksoze, një jaht, si dhe llogari bankare dhe aksione në subjekte tregtare.
Në listën e pasurive të sekuestruara për Ergys Agasin përfshihen:
– Pasuria e llojit pyll me sipërfaqe 26690.9 m², nga kjo ndërtesë me sipërfaqe 346.2 m², në Qeha Shytaj, Petrelë, Tiranë;
– Pasuria e llojit pyll me sipërfaqe 5288.1 m², nga kjo ndërtesë 1 kat me sipërfaqe 182.2 m², në Qeha, Petrelë, Tiranë;
– Pasuria e llojit pyll me sipërfaqe 5288.1 m², nga kjo ndërtesë 1 kat me sipërfaqe 182.2 m², në Qeha, Petrelë, Tiranë;
– Pasuria e llojit pyll me sipërfaqe 8956 m², nga kjo ndërtesë 1 kat me sipërfaqe 568 m², në Qeha, Petrelë, Tiranë;
– Pasuria e llojit pyll me sipërfaqe 8260.2 m² dhe ndërtim 2 kat me sipërfaqe 490.2 m²;
– Pasuria e llojit pyll me sipërfaqe 911.3 m², nga kjo ndërtesë me sipërfaqe 350.8 m²;
– Pasuria e llojit pyll me sipërfaqe 9316.1 m², nga kjo ndërtesë 2 kat me sipërfaqe 192.8 m²;
– Pasuria e llojit truall me sipërfaqe 406.34 m² me ndërtesë, në Lundër, Tiranë;
– Pasuria e llojit arë me sipërfaqe 10300 m²;
– Pasuria nr. 47/215, truall me sipërfaqe 400 m², në zonën kadastrale 8518, Durrës;
– Pasuria e llojit ndërtesë në ZK 8518 me sipërfaqe totale 165 m²;
– Pasuri të tjera si apartamente në Durrës dhe Tiranë, garazhe, truall dhe ndërtesë në Gjilek, Vlorë;
– Automjet Land Rover Defender 2023;
– Subjekti “E.A.Solutions”;
– Llogari bankare në OTP, Credins dhe BKT.
Fokusi i ri te “Equos Resort” tregon se hetimet nuk po ndalen vetëm te burimi i fondeve, por po shtrihen edhe te mënyra se si këto pasuri janë regjistruar dhe legalizuar. Dyshimet për ndërhyrje në proceset e kadastrës dhe kalimin e pronave në mënyrë të paligjshme në emër të personave nën hetim pritet të jenë një nga drejtimet kryesore të hetimit në vijim.
Operacioni i sotëm sinjalizon një fazë të re të hetimit, ku përveç ndjekjes së rrjedhës së parave, po verifikohet edhe legjitimiteti i pronësisë mbi asetet e krijuara gjatë viteve. /skyweb.al
