Pas një odiseje që zgjati më shumë se dy ditë, rreth 400 pasagjerë shqiptarë janë rikthyer në Shqipëri pasi mbetën të bllokuar në aeroportin e Brindisit të braktisur nga kompania Wizz Air.
Ata mbërritën mëngjesin e së enjtes në Portin e Vlorës, duke u kthyer në vend me traget, pasi nuk u ofrua asnjë zgjidhje ajrore për rikthimin e tyre.
Udhëtimi i pasagjerëve kishte nisur dy ditë më parë nga Bergamo dhe Bolonja, me destinacion Tiranën. Për shkak të kushteve të pafavorshme të motit, avionët nuk arritën të uleshin në Rinas dhe u detyruan të devijonin drejt Brindisit.
Ajo që duhej të ishte një ndalesë e përkohshme u shndërrua në një bllokim të gjatë dhe të pasigurt.
Sipas dëshmive të pasagjerëve, pas uljes në Brindisi, kompania ajrore Wizz Air nuk ndërhyri për t’i asistuar apo për të organizuar rikthimin e tyre në Shqipëri.
Ata mbetën pa informacion të qartë, pa strehim dhe pa alternativa transporti, duke u detyruar të qëndrojnë për orë të tëra në aeroport ose të kërkojnë vetë zgjidhje të përkohshme.
Pas më shumë se 48 orësh pritjeje, rikthimi me traget mbeti e vetmja mundësi reale për një pjesë të madhe të udhëtarëve.
Ngjarja po cilësohet si një nga rastet më të rënda të trajtimit të pasagjerëve nga kompania ajrore, ndërsa deri më tani nuk ka pasur asnjë reagim zyrtar lidhur me bllokimin dhe braktisjen e mbi 400 qytetarëve në Brindisi. /skyweb.al
