Çmimet e arit arritën sot nivele rekord, të mbështetura nga pasiguria e vazhdueshme gjeopolitike dhe ekonomike, e cila po rrit kërkesën e investitorëve për asete të sigurta.
Ari u rrit me rreth 0.4 për qind, duke u tregtuar në 4.954 dollarë për ons rreth orës 07:00, pasi më herët gjatë seancës preku një rekord historik prej 4.967 dollarësh. Gjatë javës, çmimi i metalit të çmuar është rritur me rreth 7.8 për qind.
Në 12 muajt e fundit, ari ka shënuar një rritje prej afro 80 për qind dhe rreth 15 për qind që nga fillimi i vitit, i nxitur nga tensionet e shtuara tregtare dhe gjeopolitike, si edhe nga uljet e normave të interesit nga bankat qendrore kryesore.
Edhe argjendi shënoi rritje të ndjeshme, duke avancuar me 3 për qind në 99.38 dollarë për ons. Gjatë vitit të kaluar, çmimet e argjendit janë rritur me mbi 225 për qind.
Analistët e tregut theksuan se shqetësimet e vazhdueshme gjeopolitike mbeten një faktor kyç për lëvizjet e çmimeve, veçanërisht pas debateve rreth Grenlandës, të nxitura nga deklaratat e fundit të presidentit amerikan Donald Trump, i cili paralajmëroi vendosjen e tarifave shtesë ndaj vendeve që kundërshtojnë kontrollin e territorit nga SHBA-ja dhe dislokimin e personelit ushtarak atje.
Pasigurinë në treg e shtuan edhe deklaratat e Trumpit për Iranin. Duke folur për gazetarët në bordin e “Air Force One” të enjten vonë, ai tha se SHBA-ja kishte dislokuar një flotë detare që po i afrohej Iranit, duke paralajmëruar Teheranin kundër përdorimit të dhunës ndaj protestuesve ose rifillimit të programit bërthamor.
“Do të preferoja të mos ndodhte asgjë. Ne kemi një armatë dhe një flotë shumë të madhe që po shkon në atë drejtim, dhe ndoshta nuk do të jetë e nevojshme ta përdorim. Do të shohim,” u shpreh ai.
