Revolucioni i inteligjencës artificiale ka mbërritur dhe kundërshtimet po bëhen gjithnjë e më të forta, shkruan Reuters.
Teksa inteligjenca artificiale po transformon industritë dhe tregjet në mbarë botën, një ndjenjë frike po rritet mes të rinjve “digital natives” që po hyjnë tani në tregun e punës, të shqetësuar për ndikimin që kjo teknologji mund të ketë te vendet e punës dhe jeta e përditshme, ndërsa ChatGPT, Claude dhe Gemini po bëhen emra të njohur për të gjithë.
Në një fjalim këtë javë, ish-drejtori ekzekutiv i Google, Eric Schmidt, u tha studentëve të diplomuar të Universitetit të Arizonës se ndikimi i inteligjencës artificiale do të ishte “më i madh, më i shpejtë dhe me më shumë pasoja” se çdo gjë tjetër më parë.
“Ajo do të prekë çdo profesion, çdo klasë, çdo spital, çdo laborator, çdo person dhe çdo marrëdhënie që keni”, tha ai, ndërsa në sallë u dëgjuan fishkëllima, edhe pse ai po përpiqej të adresonte ankthin për sigurinë në punë dhe të ardhmen e pasigurt.
Sa reale janë këto frikëra u pa edhe në njoftimin e së martës nga Standard Chartered, e cila deklaroi se do të shkurtojë mbi 7 mijë vende pune dhe do të zëvendësojë “kapitalin njerëzor me vlerë më të ulët” me inteligjencën artificiale.
Shumë kompani teknologjike po reduktojnë gjithashtu stafet, duke përmendur AI si arsye. Meta, e cila po instalon programe gjurmimi në kompjuterët e punonjësve në SHBA për të trajnuar modelin e saj të AI-së, planifikon të largojë nga puna 10% të forcës së saj globale të punës duke nisur nga ky muaj.
Ndërkohë, Amazon ka shkurtuar rreth 30 mijë vende pune në sektorin korporativ muajt e fundit, teksa po fokusohet te inteligjenca artificiale dhe eficienca, ndërsa në shkurt kompania fintech Block shkurtoi pothuajse gjysmën e stafit të saj./skyweb
