Kryeministri Edi Rama zhvilloi sot, më 15 janar, një bisedë të hapur me 40 rektorë të universiteteve publike dhe private, ku në fokus ishte cilësia e institucioneve të arsimit të lartë dhe kërkimi shkencor.
Gjatë fjalës së tij, Rama theksoi nevojën për riformatimin e ligjit të arsimit të lartë, duke nënvizuar se para nisjes së sesionit të ri parlamentar duhet të përgatitet baza për korrektimet që do të ndërmerren.
“Duke vlerësuar sinqerisht bashkëpunimin që kemi ndërtuar dhe vijmësinë e komunikimit në një rrugë sa institucionale aq edhe të hapur informale, gjë që na ka dhënë mundësinë të jemi vazhdimisht në kontakt me njëri-tjetrin dhe të dëgjojmë e të kuptojmë më shumë në kohë reale, është koha për të rivizituar ligjin e arsimit të lartë, pasi ka kaluar një periudhë e mjaftueshme për të reflektuar ndryshimet që ka sjellë koha,” u shpreh kryeministri.
Ai shtoi se ligji aktual është ndërtuar me kontributin e vetë universiteteve dhe se e njëjta praktikë do të ndiqet edhe këtë herë. “Fatmirësisht kemi një praktikë të mirë të mëparshme, ligji aktual është shkruar me kontributin tuaj dhe ma ha mendja se ky do të jetë rasti përsëri,” tha Rama, duke theksuar se nuk bëhet fjalë për përmbysje, por për korrektime që mund të realizohen brenda një kohe të arsyeshme përmes një grupi të përbashkët pune.
Një tjetër çështje kyçe e evidentuar ishte ndërkombëtarizimi i universiteteve dhe racionalizimi i burimeve dhe potencialeve, si dhe nevoja për të diskutuar më tej financimin e arsimit të lartë.
“Në takimin e ardhshëm të mblidhemi për të diskutuar hapur procesin dhe do doja të ftonim edhe të gjithë rektorët e universiteteve private,” deklaroi Rama.
Kryeministri u ndal gjithashtu te projektet infrastrukturore universitare, duke përmendur dy kampuse të rëndësishme. “Kemi dy kampuse përpara, atë të Tiranës, në ndërkohë kemi hapur procesin për kampusin e universitetit Aleksandër Moisiu,” tha ai.
Sipas Ramës, ekziston potencial për ndërtimin e rezidencave studentore, veçanërisht në Durrës, duke pasur parasysh edhe funksionimin e afërt të trenit. “Do të jetë e thjeshtë që studentët në Tiranë të strehohen në kampusin e Durrësit, prandaj do ndërtojmë një kompleks studentor rezidencial, për shkak të çmimeve të larta në Tiranë, edhe në Durrës xhanëm, por në Tiranë…”, u shpreh kreu i qeverisë. /skyweb.al
